महारानी अस्पताल जगदलपुर म आंखी के इलाज बर ‘अम्बक’ के शुभारंभ करिस मुख्यमंत्री भूपेश बघेल

अंजोर.जगदलपुर। मुख्यमंत्री भूपेश बघेल ह जगदलपुर जिला अस्पताल (महारानी अस्पताल) म नेत्र रोग विंग ‘अम्बक’ के सुरू करिन। जिला अस्पताल के नेत्र रोग विभाग के भवन के 35 लाख रूपिया के लागत ले रिनोवेट करके उहां ऑपरेशन थिएटर म नवा मशीन स्थापित के गे हावयं अउ इहां मरीज मन के खातिर सुविधा बढ़ाये गे हावयं। ‘अम्बक’ म दू विशेषज्ञ डॉक्टर मन सहित आँखी के आने-आने रकम ले के ऑपरेशन के सुविधा हावय। इहां के आईपीडी म 20 खटिया उपलब्ध हावयं। उप मुख्यमंत्री अउ स्वास्थ्य मंत्री टी.एस. सिंहदेव अउ वाणिज्य अउ उद्योग मंत्री कवासी लखमा तको सुरू कार्यक्रम म सामिल होइस।

जगदलपुर जिला अस्पताल म नेत्र रोग विंग के सुरू के बाद मुख्यमंत्री भूपेश बघेल इहां के आईपीडी म उपचार करात मरीज मन ले मिलके अउ उंकर ले गोठबात करके उंकर स्वास्थ्य अउ आँखी के रोशनी के बारे म जानकारी लिस। ओमन मरीज मन के फल तको भेंट करिस। मुख्यमंत्री ह इहां के सर्वसुविधायुक्त आपरेशन थिएटर तको देखिस। संसदीय सचिव रेखचंद जैन, बस्तर विकास प्राधिकरण के अध्यक्ष लखेश्वर बघेल, विधायक राजमन बेंजाम अउ विक्रम मंडावी, क्रेडा के अध्यक्ष मिथिलेश स्वर्णकार, इंद्रावती बेसिन विकास प्राधिकरण के अध्यक्ष राजीव शर्मा अउ महापौर श्रीमती सफीरा साहू सहित केऊ जनप्रतिनिधि अउ अधिकारी तको ए बखत मौजूद रिहिस।

जगदलपुर जिला अस्पताल म ए साल अब तक 1052 मरीज मन के मोतियाबिंद के ऑपरेशन

जगदलपुर जिला अस्पताल के नेत्र रोग विभाग डहर ले राष्ट्रीय अंधत्व निवारण कार्यक्रम (एनपीसीबी) के ले मोतियाबिंद मुक्त बस्तर अभियान के तहत रोज औसतन 140-160 ओपीडी अउ 25-30 आईपीडी के जा रेहे हावय। ए साल अप्रैल ले जुलाई तक कुल 5745 ओपीडी मरीज मन के इलाज के संग ही 1052 मोतियाबिंद के मरीज मन के फोकट म सफल ऑपरेशन करे गे हावय। राष्ट्रीय अंधत्व निवारण कार्यक्रम (एनपीसीबी) के ले जिला के आने-आने स्कूल म चालू वित्तीय साल म अब तक 5439 छात्र-पढ़इया लइका के आँखी के जाँच के गे हावय। दृष्टि दोष वाला 52 पढ़ईया मन ल फोकट म चश्मा तको दे हावय।