साकेत साहित्य परिषद सुरगी म होइस काव्य गोष्ठी, सितंबर म होही 24 वां वार्षिक सम्मान समारोह

अंजोर.ए.राजनांदगांव। साकेत साहित्य परिषद सुरगी डहर ले युवा कवि भूपेन्द्र कुमार साहू प्रभात (मुड़पार) के संयोजन म मासिक बइठक अउ काव्य गोष्ठी के आयोजन करे गिस। मिले आरो के मुताबिक साकेत भवन सुरगी म आयोजित बइठका के अध्यक्षता परिषद के अध्यक्ष लखन लाल साहू लहर ह करिस। बइठका म 24 वां वार्षिक सम्मान समारोह मनाये अउ साकेत स्मारिका -2023 प्रकाशित करे के बिसय म गुनान करे गिस। जेमा फइसला लिस के 24 सितंबर 2023 इतवार के 24 वां वार्षिक सम्मान समारोह आयोजित करे जाही। एमे परिचर्चा के संग ही दूसरइया दौर म साहित्यकार अउ लोक कलाकार मनला साकेत सम्मान -2023 ले सम्मानित करे जाही। तीसरा सत्र म कवि सम्मेलन होही जेमा उपस्थित सबो रचनाकार मन काव्य पाठ करही। 

रिमझिम फुहार के बीच आयोजित ए मासिक बइठक के दूसरइया सत्र म सरस कविता पाठ के दौर चलिस जेमा साकेत के अध्यक्ष, हास्य व्यंग कवि, गीतकार लखन लाल साहू लहर ह  अपन चर्चित आषाढ़ गीत के संग काव्य पाठ के आगाज करिन। पूर्व अध्यक्ष ओमप्रकाश साहू अंकुर ह मोबाइल, रुस - यूक्रेन युद्ध के संग ही आन विषय म छंदबद्ध रचना पढि़स। वरिष्ठ कवि फागू दास कोसले ह हास्य-व्यंग कविता ले आनंदित कर दीस। युवा कवि फकीर प्रसाद साहू फक्कड़ ह कविता पाठ के संग ही अपन व्यंग्य लेख "बेरा -बेरा के राम " के पाठ करके साहित्यकार मनला प्रभावित करिन। परिषद के सचिव कुलेश्वर दास साहू ह सम सामयिक विषय म रचना सुनाईस। भूपेंद्र साहू प्रभात ह देशभक्ति के संग ही वियोग श्रृंगार ले परिपूर्ण रचना प्रस्तुत करिस। युवा कवि द्वय बलराम सिन्हा रब अउ डोहर दास साहू ह अपन शानदार प्रस्तुति दीस। 

ए मउका डा. एस कुमार साहू ह साकेत परिषद ले जुड़े संस्मरण के साझा करिन। संस्था  के बताती म गोष्ठी के संचालन ओमप्रकाश साहू अंकुर अउ आभार व्यक्त संयोजक कवि भूपेन्द्र कुमार साहू प्रभात ( मुड़पार) ह करिन। कार्यक्रम के आखिर म परिषद के जरूरी स्तंभ, वरिष्ठ साहित्यकार महेन्द्र कुमार बघेल मधु के भैया, आसरा म पदस्थ शिक्षक  स्व.यज्ञदत्त बघेल के आकस्मिक निधन म गहरा दुःख व्यक्त करत दू मिनट मौन धारण करके श्रद्धांजलि अर्पित करे गिस।