ले सुरू होगे चिंगरा पगार म पानी : खेमराज साहू, चिंगरा पगार जलप्रपात-बारूका (गरियाबंद)

प्रकृति के दिये उपहार म मनोहारी चित्रण चिंगरा पगार जलप्रपात हे जेन गरियाबंद जिला मुख्य मार्ग ले रायपुर से गरियाबंद रद्दा के डेरी बाजू सड़क ले मात्र अढ़ई किलोमीटर म हवय। बरसात के लगती म, अधिकतर पहाड़ी पठार ले पानी ह रिस के गिरथे अउ एक नरवा कस बोहावत झरना बनाथे। वइसने ही हमर गरियाबंद जिला म घलो बड़ अकन झरना हे। जेमा चिंगरा पगार म लोगन जादा जाथे काबर कि इहा तक जाए म मुरम के पैडगरी रद्दा बने हवय। प्रकृति प्रेमी, युवक-युवती अउ कतको परिवार घलो ये झरना के मजा ले खातिर जाथे। फेर नजारा देखत आज के युवा पीढ़ी मन म कतको बहक जाथे, कतको गलत हरकत करथे। प्राकृतिक जगह म नशीला पदार्थ ले के भी चले जाथे, उपर जिहा ले झरना बोहावत हे उहूचो चढ़ जथे। कतकोन ह भटक घलो गे रहिस जेन ल जानकारी मिले त अधरतिहा तक रेस्क्यू करके उपर ले नीचे लाए गे हवय।

सुरक्षा अउ प्रकृति के दोहन ल बचाय खातिर प्रकृति के उपहार ल हरेक युवा पीढ़ी ल समझना चाही। विशेष सहयोग बारूका गाँव के ग्रामीण व युवा पीढ़ी मनके लेना चाही, पिकनिक के नाम ले भी जाहू ह त जंगल म कचरा झन करहू इहि सादर निवेदन हे। आगू जिला प्रशासन गरियाबंद ले घलोक गेलौली हावय के अइसन ठउर म सुरक्षा बेवस्थाू अउ प्रकृति के प्रति सजग रहें बर उचित कार्यवाही करय। 1. मार्ग बेरिकेडिंग बेवस्था। 2. चार बजे के बाद जलप्रपात के तीर जाये बर मनाही। 3. नशीला पदार्थ (दारू, गांजा, अउ आन मादक पदार्थ) सक्तक मना। 4. ऊपरी छोर म जबर सुरक्षा घेरा। अउ चाक चौबंद करे ले लोगन मन अऊ परिवार संग आगे प्रकृति के दिये उपहार म मनोहारी चिंगरा पगार जलप्रपात म बेरा पहाही। संग म गरियाबंद जिला के सोर देस-दुनिया म बगरही अऊ पर्यटन के नक्शाम म बारूका ह ऊंचहा ठउर पाही।

0 खेमराज साहू