लइका ही हमर भविष्य, इंकर खातिर शिक्षा के बढि़या वातावरण देना अउ संसाधन तइयार करना हमर जिम्मेदारी : मुख्यमंत्री भूपेश बघेल

अंजोर.रायपुर। लइका ल शिक्षा के संग खेलकूद अउ अनुशासन म तको धियान देना हावय। पढ़ईया जिनगी म ही समय के कीमत समझना होही। ये बात मुख्यमंत्री भूपेश बघेल  ह शिक्षा सत्र 2023-24 के सुरू अउ स्कूल प्रवेशोत्सव के मउका म आज प्रोफेसर जेएन पांडेय सरकारी उत्कृष्ट हिन्दी माध्यम स्कूल  म कहीं। मुख्यमंत्री ह अपन संबोधन म किहिन के सबोच स्कूल शिक्षा के मंदिर होवत  हावय अउ ए मंदिर के तको  हमेशा साफ सुथरा रहना चाही। मुख्यमंत्री ह अपन संबोधन म किहिन के स्वामी आत्मानंद स्कूल के खुले ले राज्य म शिक्षा के प्रति फेर ले रूझान बढ़ाहे हावय अउ अभी के बेरा म सबोच वर्ग के लोगन अपन लइका के ये स्कूल म पढ़ाने के खातिर प्रयासरत हावयं।

मुख्यमंत्री ह तिलक लगाके अउ मिठाई खिलाके पढ़इया लइका के कराइन स्कूल प्रवेश

मुख्यमंत्री ह स्कूल प्रवेशोत्सव के मउका म स्कूली लइका ल तिलक लगाके, माला पहिना के अउ ओला मिठाई खिलाके स्कूल प्रवेश कराइन। ए मउका म मुख्यमंत्री ह स्कूली लइका ल गणवेश, पुस्तक अउ स्कूल बैग के तको बाटिस।   मुख्यमंत्री ह विद्यार्थी, शिक्षक-शिक्षिकाओं, प्राचार्य अउ अभिभावक मनला नवा  शिक्षा सत्र के सुरू अउ स्कूल प्रवेशोत्सव के बधाई देत किहिन के इही लइका हमर भविष्य हावयं अउ ये लइका के शिक्षा के उचित वातावरण देना हमर जिम्मेदारी हावय ताकि इंकर पढ़ाई म मन लगे रिहि।

ऐतिहासिक स्कूल प्रो. जेन पांडेय सरकारी उत्कृष्ट हिंदी माध्यम विद्यालय, राज्य के इहां ले मिले हावयं 4 मुख्यमंत्री अउ एक उप राष्ट्रपति

प्रो. जेएन पांडेय स्कूल एक ऐतिहासिक स्कूल हावय। ए स्कूल के स्थापना सन 1864 म होए रिहिस अउ ये स्कूल कभू कलकत्ता विश्वविद्यालय अउ इलाहाबाद विश्वविद्यालय ले तको संबद्ध रिहिन हावय। ए स्कूल ह राज्य के चार मुख्यमंत्री दे हावयं। स्व. पं. रविशंकर शुक्ल, स्व. दुवारिका प्रसाद मिश्रा, स्व. श्यामा चरण शुक्ल अउ स्व. मोती लाल वोरा इही स्कूल के पढ़ईया रिहिन हावयं। येकर संग ही देश के पहिली उपराष्ट्रपति स्व. हिदायतुल्ला तको इही स्कूल के पढ़ईया रिहिन हावयं।

स्कूल प्रवेशोत्सव के मउका म छत्तीसगढ़ हाउसिंग बोर्ड के अध्यक्ष अउ विधायक कुलदीप जुनेजा,  रायपुर नगर निगम के महापौर ऐजाज ढेबर, छत्तीसगढ़ खनिज विकास निगम के अध्यक्ष गिरीश देवांगन, छत्तीसगढ़ गौ सेवा आयोग के अध्यक्ष महंत रामसुंदर दास,  शिक्षा विभाग के प्रमुख सचिव आलोक शुक्ला, शिक्षा  विभाग के सचिव डॉ एस भारती दासन समेत विभाग के अधिकारी  अउ स्कूल के विद्यार्थी, शिक्षक, प्राचार्य अउ अभिभावक मौजूद रिहिस।