अंजोर.रायपुर। बी. आर. यादव. राज्य खेल प्रशिक्षण केंद्र बहतराई बिलासपुर म खेल अउ युवा कल्याण विभाग डहर ले संचालित आवासीय खेल अकादमी ले हॉकी खिलाड़ी कुमारी गीता यादव के चयन भारतीय खेल प्राधिकरण के ‘खेलो इण्डिया वार्षिक स्कॉलरशिप’ के खातिर करे गे हावय। कुमारी गीता यादव के स्कॉलरशिप के तहत हरेक साल 6 लाख 20 हजार रूपिया दे जाही। मुख्यमंत्री भूपेश बघेल ह गीता यादव के ए उपलब्धि म बधाई अउ सुभकामना देत किहिन के उंकर ये उपलब्धि बाकी खिलाड़ी ल प्रेरणा देही। खेल अउ युवा कल्याण मंत्री उमेश पटेल ह गीता के बधाई दीस अउ किहिन के राज्य सरकार खिलाड़ी के अंतर्राष्ट्रीय मानक के हिसाब ले बढि़या सुविधा उपलब्ध कराये खातिर आने-आने खेल अकादमी बनाये हावय। ताकी इहां ले खिलाड़ी प्रशिक्षण पाके देश के नाम रोशन करें।
खेलो इण्डिया नवा दिल्ली डहर ले 16 ले 20 मई 2023 तक एसेसमेंट कैंप के आयोजन करे गिस रिहिस। राजनांदगांव म आयोजित वेस्ट जोन जूनियर हॉकी प्रतियोगिता म छत्तीसगढ़ ले नेशनल टीम के सदस्य रेहे कुमारी गीता यादव ह शानदार प्रदर्शन करिन रिहिस। प्रदर्शन के आधार म हॉकी के प्रशिक्षणार्थी खिलाड़ी कु. गीता यादव के चयन खेलो इंडिया स्कॉलरशिप के खातिर करे गिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।