कोरबा जिला के छोटे से गांव के रामनारायण श्रीवास ल मुख्यमंत्री भूपेश बघेल के पहल म बहतराई खेल अकादमी म मिलिस प्रवेश

अंजोर.कोरबा। कोरबा जिला के एक छोटे से गांव के पढ़ईया रामनारायण श्रीवास के सपना ल पंख मिलगे हावय। मुख्यमंत्री भूपेश बघेल के संवेदनशील पहल ले रामनारायण के बहतराई खेल अकादमी म प्रवेश देवाइस। अकादमी ले प्रशिक्षण लेके वो ह अब एथेलेटिक्स बनही।

जिला के विकासखंड पोड़ी उपरोडा के बस्तीपारा बनिया गांव म पढ़ईया राम नारायण श्रीवास के एथलेटिक्स म बिसेस रूचि रिहिस,  उंकर स्कूल म खेलकूद रिहिस, तब ओमन 800 मीटर दौड़ म पहिली अउ 1500 मीटर दौड़ म दूसरा ठऊर  हासिल करे रिहिस। फेर बने प्रशिक्षण के अभाव म वो ह राज्य स्तरीय खेल म ठऊर  नइ बना पाइस। 

मुख्यमंत्री भूपेश बघेल के भेंट मुलाकात कार्यक्रम के बखत जब गांव पिपरिया म गांव वाला ले रूबरू होइस त रामनारायण ल तको मुख्यमंत्री के तीर अपन बात रखे के मउका मिलिस। ओमन प्रशिक्षण देवाये के मांग रखिस ताकि वो ह एथलेटिक्स म आगू बढ़ सके। मुख्यमंत्री ह उंकर ले वादा करिन के ओला बहतराई खेल अकादमी म प्रवेश देवाही। मुख्यमंत्री के निर्देश म खेल विभाग डहर ले तुरते कार्रवाई करत रामनारायण ल खेलो इंडिया स्टेट सेंटर ऑफ एक्सीलेंस बहतराई बिलासपुर म प्रवेश कराये हावय अउ ओला अभी असेसमेंट कैंप म रखे गे हावय। राम नारायण के प्रशिक्षण सुरू होगे हावय, जिहां वो ह लगन के संग ट्रेनिंग लेत हावय।