स्वामी विवेकानंद जयंती ’राष्ट्रीय युवा दिवस’ म प्रदेसवासी के बधाई दीस मुख्यमंत्री भूपेश बघेल

स्वामी विवेकानंद जयंती ’राष्ट्रीय युवा दिवस’ 

अंजोर.रायपुर। 12 जनवरी के विख्यात दार्शनिक अउ आध्यात्मिक गुरू स्वामी विवेकानंद जी के जयंती ‘राष्ट्रीय युवा दिवस’ म प्रदेसवासी ल हार्दिक बधाई अउ सुभकामना दीस मुख्यमंत्री भूपेश बघेल ह। श्री बघेल ह अपन शुभकामना संदेश म किहिन के स्वामी विवेकानन्द जी के विचार ह सरी समाज ल एक नवा दिशा दे हावय। ओमन अपन उपदेस अउ ओजस्वी व्याख्यान ले देश-दुनिया के मानव जाति ल सेवा के रद्दा देखाइस। स्वामी जी के ‘उठो, जागो अउ तब तक नइ रूको जब तक लक्ष्य पाए न हो जाये‘ जइसे कई सूक्त वाक्य युवा मन ल नवा ऊर्जा ले भर देत हावयं। उन्तालीस साल के कम उमर म स्वामी जी जेन विचार के अतुल्य विरासत हमन ल सौंप गे हावयं, वो पीढ़ी तक हमर रद्दा प्रशस्त करत रइही।

मुख्यमंत्री बघेल ह किहिन हावय के छत्तीसगढ़ के खातिर सम्मान अउ गर्व के बात हावय के स्वामी विवेकानंद जी के नानपन के कुछ समय रायपुर म बीते हाबे। राज्य सरकार रायपुर म बसी स्वामी जी के अमूल्य सुरता ल सहेजे अउ संवारे के प्रयास करत हावय। रायपुर म बूढ़ापारा स्थित स्वामी जी के निवास ठऊर  रायबहादुर भूतनाथ डे चेरिटेबल ट्रस्ट के भवन के स्वामी विवेकानंद स्मारक के रूप म विकसित करे गे हावय। रायपुर के बूढ़ातालाब ल विवेकानंद सरोवर के नाम दे हावय। इहां विवेकानंद जी के ध्यानमग्न मुद्रा म स्थापित मूरति एक बारगी स्वामी जी के ओज अउ उपस्थिति ल जीवंत बना देत हावय। नवा रायपुर स्थित विमानतल के नाम विवेकानंद जी के नाम म रखे गे हावय येकर ले हर यात्री अनायास स्वामी जी ले जुड़ जाथे। स्वामी जी ले जुरे सुरता रायपुर के विश्वपटल म एक बिसेस पहचान देत हावयं। मुख्यमंत्री ह किहिन के स्वामी जी के विचार अउ जिनगी कीमत ले हमन ल हमेशा प्रेरित करत रइही।