 |
| छत्तीसगढ़ के उत्तरी छोर के आखिरी गांव पुंदाग म आजादी के 75 साल बाद सड़क के काम शुरू |
अंजोर.रायपुर। पुंदाग गांव बलरामपुर जिला मुख्यालय ले करीब 140 किलोमीटर के दूरी म हावय। गांव के आबादी करीब 22 सौ हावय। ए गांव के जिला मुख्यालय बलरामपुर ले कनेक्टिविटी आजादी के 75 साल बाद तको नइ हो पाये रिहिस। अब मुख्यमंत्री भूपेश बघेल के निर्देश म सड़क बनाये के काम सुरू होइस हावय जेन इहां के लोगन के सपना के सच होए जइसे हावय।
पुंदाग गांव के पहाड़ी कोरबा जनजाति के अमावस बतात हावयं के मोर उमर करीब 40 साल हावय। फेर मैं अब तक जिला मुख्यालय बलरामपुर नइ गे हावं। कारन पूछे म कहत हावयं के इहां ले बलरामपुर जाये बर सड़क ही नइ रिहिस। हमर गांव के लोगन काम पड़े म झारखंड के रद्दा छत्तीसगढ़ आना-जाना करत रिहिस। कभू कोनो बीमार परत रिहिस त बड़का परेशानी होवत रिहिस। वो कहत हावयं के सड़क बन जाये ले हमर लइका ल बड़का फायदा होही, वो उच्च शिक्षा बर गांव ले बाहिर जा पाही।
भौगोलिक परिस्थिति अउ नक्सल समस्या रिहिस बाधा
पुंदाग जाये बर घने जंगल अउ कई घाट पड़त हावयं। दुर्गम इलाका होए के सेती ले इहां सड़क बनाये के बुता आसान नइ रिहिस। बीच रद्दा म कई सारी चट्टान अउ नाला बड़का बाधा रिहिस। येकर संग ही ये इलाका अति नक्सल प्रभावित रिहिस। ए गांव के तुरते बाद झारखंड सीमा म बूढ़ापहाड़ इलाका हावय जेला नक्सली मन के गढ़ माने जात रिहिस। राज्य बने के बाद ले ए इलाका म करीब 435 नक्सल घटना होइसं फेर पाछु 4 साल के बात करें त मात्र 4 छुटपुट घटना होइस हावयं, संग ही एक भी जान-माल के नुकसाल नइ होइस हावय। पुलिस ह ए क्षेत्र ले नक्सली मन के करीब-करीब खदेड़ दे हावय।
नक्सली ले निपटे खातिर खोले गिस 4 कैंप
पहिली म नक्सली घटना मन के चलत ए क्षेत्र म विकास बुता के गति थोकिन धीमी होगे रिहिस। फेर पाछु 4 साल म इहां 24 किलोमीटर म 4 कैंप स्थापित करे गे हावयं। ये कैंप सबाग, बंदरचुआ, भुताही अउ पुंदाग म लगाये गे हावयं। ये कैंप के खोले म राज्य सरकार ह पूरा मदद उपलब्ध कराइन हावय। इहां म जवान मन के खातिर पेयजल उपलब्ध कराये बर कई बोर कराइन हावयं। कैंप खुले के नतीजा ये होइस के इहां नक्सली घटना एकदम शून्य के तनि हावयं अउ इलाका म विकास बुता तेजी ले सुरू हो गे हावय।
विकास ले जोड़े गांव वाला ल सबो सुविधा
बलरामपुर कलेक्टर विजय दयाराम के. बतात हावयं के ए गांव म शिक्षा, स्वास्थ्य अउ आन योजना पहुंचे बर सबले जरूरी रिहिस के सबले पहिली सड़क बनाये जाये। जिला प्रशासन ह दुर्गम परिस्थिति के बावजूद बंदरचुआ ले भुताही तक करीब 6 किलोमीटर सड़क बना दीस हावय। भुताही ले पुंदाग तक सड़क बनाये के काम तेजी ले चलत हावय। येकर संग ही भुताही म मोबाइल टॉवर अउ ट्रांसफॉर्मर लग गे हावयं। जेन इलाका म फोन म बात करना मुश्किल रिहिस उहां मोबाइल टावर लगे ले ग्रामीण 4 जी सेवा के उपयोग करत हावयं पुंदाग गांव म इही महीना सब हेल्थ सेंटर तको सुरू हो जाही। स्कूल भवन के रिनोवेशन करे जात हावय।
पुंदाग म राशन दुकान, बिजली पोल अउ धान खरीदी केंद्र जल्द
अंतिम छोर म बसे ए गांव के लोगन सड़क नी होए ले अब तक राशन ले बर भुताही तक आवे। फेर जिला प्रशासन सड़क बने के बाद ए गांव म राशन पहुंचाना सुरू कर दिही। इहां के किसान सड़क नी होए के सेती ले सामरी धान खरीदी केंद्र म धान बेचे जात रिहिस म अब इहां धान खरीदी केंद्र खोले के प्रस्ताव तको भेज दे हावय। पुदांग गांव म अब तक सोलर लाइट ले ही काम चलत हावय। सड़क बनते ही इहां बिजली के खंबा लगाये के काम सुरू होवइया हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।