 |
| राज्य स्तरीय युवा महोत्सव 2022-23 : राजधानी म 28 ले 30 जनवरी तक |
सुवा, पंथी, करमा, सरहुल, बस्तरिया, राउत नाचा, फुगड़ी, भौंरा अउ गेड़ी दौड़ युवा महोत्सव के प्रमुख आकर्षण
तीन दिवसीय छत्तीसगढ़ लोक साहित्य सम्मेलन तको
अंजोर.रायपुर। मुख्यमंत्री भूपेश बघेल के अगुवई म राज्य शासन, खेल अउ युवा कल्याण विभाग अउ संस्कृति विभाग डहर ले राजधानी रायपुर म 28 जनवरी ले तीन दिवसीय राज्य स्तरीय युवा महोत्सव अउ छत्तीसगढ़ लोक साहित्य सम्मेलन के आयोजन करे जात हावय। ए युवा महोत्सव म प्रदेशभर के 3 हजार भाग लेवइया 38 विविध विधा मन म सामिल होही। छत्तीसगढ़ी ग्रामीण पृष्ठभूमि ले संबंधित खेल फुगड़ी, भौंरा, गेड़ी दौड़, कबड्डी अउ खो-खो के संग छत्तीसगढ़ी लोक गीत अउ लोक नृत्य करमा, राउत नाचा, पंथी, सरहुल, सुवा, बस्तरिया नृत्य के आकर्षक प्रस्तुति राज्य स्तरीय युवा महोत्सव म दिखही। संग ही छत्तीसगढ़ी संस्कृति ले संबंधित चित्रकला, छत्तीसगढ़ के पारंपरिक वेशभूषा अउ व्यंजन के फूड फेस्टिवल के आयोजन महोत्सव म करे जाही। संस्कृति विभाग डहर ले ए साल 28 ले 30 जनवरी तक छत्तीसगढ़ लोक साहित्य सम्मेलन के तको आयोजन करे जाही।
राज्य स्तरीय युवा महोत्सव के पहिली दिन 28 जनवरी के राजधानी रायपुर के साइंस कॉलेज मैदान खेल संचालनालय परिसर म मंझनिया 2 बजे ले 6 बजे तक मुख्य मंच म लोकनृत्य अउ करमा नाच, दूसरइया मंच म बस्तरिया नाच अउ ओपन मंच म राउत नाचा के प्रस्तुति होही। पंडित दीनदयाल उपाध्याय ऑडिटोरियम के 1500 सीटर हॉल म मंझनिया 2 बजे ले संझा 6.30 बजे तक लोकगीत अउ तात्कालिक भाषण, 100 सीटर हॉल म मंझनिया 2 बजे ले 6 बजे तक शास्त्रीय संगीत हिन्दुस्तानी अउ कर्नाटका संगीत, 60 सीटर हॉल म मंझनिया 2 बजे ले 7 बजे तक तबला अउ गिटार वादन के प्रतियोगिता होही। खेल संचालनालय के ऊपर के हॉल म दोहपर 2 बजे ले संझा 6 बजे तक निबंध अउ चित्रकला प्रतियोगिता होही। विश्वविद्यालय खेल परिसर के शारीरिक शिक्षा शिक्षण विभाग खुला मैदान अउ हॉल म मंझनिया 1 बजे ले खो-खो महिला अउ पुरुष, कबड्डी महिला अउ पुरुष अउ कुश्ती महिला अउ पुरुष वर्ग के प्रतियोगिता होही।
युवा महोत्सव के आन दिन 29 जनवरी के खेल संचालनालय परिसर के मुख्य मंच म बिहनिया 9 बजे ले मंझनिया 4 बजे तक पंथी नृत्य अउ सरहुल नृत्य, आन मंच म बिहनिया 9 बजे ले 5 बजे तक सुवा नृत्य अउ पारंपरिक वेशभूषा अउ ओपन मंच म बिहनिया 9 बजे ले मंझनिया 4.30 बजे तक फुगड़ी अउ भौरा के प्रतियोगिता होही। पंडित दीनदयाल ऑडिटोरियम के 1500 सीटर हॉल म बिहनिया 9 बजे ले संझा 7.30 बजे तक एकांकी नाटक, 100 सीटर हॉल म बिहनिया 9 बजे ले संझा 6 बजे शास्त्रीय नृत्य भरत नाट्यम, कत्थक, ओडिसी, कुचीपुड़ी अउ मणिपुरी नृत्य अउ 60 सीटर हॉल म बिहनिया 9 बजे ले संझा 6 बजे तक बांसुरी वादन, हारमोनियम, मृदंगम, सितार अउ वीणा प्रतियोगिता के आयोजन करिन जाही। खेल संचालनालय के ऊपर के हाल म बिहनिया 9 बजे ले संझा 6 बजे तक वाद-विवाद अउ क्विज प्रतियोगिता अउ खेल परिसर डोम म बिहनिया 9 बजे ले मंझनिया 1 बजे तक फूड फेस्टिवल अउ विश्वविद्यालय खेल परिसर मैदान म खो-खो महिला वर्ग सेमी फाइनल अउ फाइनल राऊंड, कबड्डी महिला वर्ग सेमी फाइनल अउ फाइनल राऊंड, कुश्ती महिला वर्ग सेमी फाइनल अउ फाइनल राऊंड अउ गेड़ी दौड़ के आयोजन होही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।