केन्द्रीय संसदीय समिति ह छत्तीसगढ़ म अनुसूचित जाति अउ जनजाति के कल्याण के बुता खातिर राज्य शासन के करिस बढ़ई

केन्द्रीय संसदीय समिति छत्तीसगढ़ म

अंजोर.रायपुर। मुख्यमंत्री भूपेश बघेल ह निवास कार्यालय म डॉ. (प्रो.) किरीट प्रेमजीभाई सोलंकी के अध्यक्षता म छत्तीसगढ़ के दू दिवसीय प्रवास म आए केन्द्रीय संसदीय समिति के सदस्य मन ले मुलाकात के बखत उंकर ले कोल माईंस के खाली खदान के जमीन राज्य सरकार ल वापस कराये, बस्तर अंचल म सुगम यातायात के दृष्टि ले रावघाट होवत जगदलपुर तक रेल लाईन विस्तार, वन क्षेत्र म विकास बुता करावत वन अधिनियम के प्रावधान म संशोधन अउ मुंबई-कोलकाता रूट के बंद रेल ल सुरू कराये के गेलौली करिन। केन्द्रीय संसदीय समिति के सदस्य मन ह  मुख्यमंत्री बघेल ले उंकर निवास कार्यालय म सौजन्य मुलाकात करिस। केन्द्रीय संसदीय समिति ह ए बखत छत्तीसगढ़ म राज्य शासन डहर ले अनुसूचित जाति अउ अनुसूचित जनजाति के उत्थान के खातिर करे  जात बुता के सराहना करिस। ओमन छत्तीसगढ़ प्रवास के अपन अनुभव ल मुख्यमंत्री के संग साझा करिन अउ प्रवास स्कूल मनके तको सराहना करिस।

अनुसूचित जाति अउ अनुसूचित जनजाति वर्ग के कल्याण के बुता- मुख्यमंत्री बघेल ह सदस्य मन के राजकीय गमछा अउ चिन्हारी चिनहा देके सम्मानित करिन। ए मउका म आदिम जाति कल्याण विभाग के सचिव डी.डी. सिंह तको उपस्थित रिहिस। जानबा होवय के केन्द्रीय संसदीय समिति छत्तीसगढ़ म अनुसूचित जाति अउ अनुसूचित जनजाति वर्ग के लोगन के सामाजिक अउ शैक्षणिक स्थिति के अध्ययन करे के खातिर दू दिवसीय दौरा म रायपुर आये हावय।

मुख्यमंत्री बघेल ह केंद्रीय संसदीय समिति के सदस्य मन के छत्तीसगढ़ म अनुसूचित जनजाति, अनुसूचित जाति के कल्याण के खातिर उठाए जात कदम के विस्तार ले जानकारी दीस। ओमन किहिन के अनुसूचित क्षेत्र म शिक्षा, स्वास्थ्य के बढि़या सुविधा के संग-संग जादा ले जादा रोजगार के मउका उपलब्ध कराये के प्रयास करे  जात हावयं। राज्य सरकार के फोकस ए बात म हावय के योजना मन ले अनुसूचित जाति, जनजाति वर्ग के लोगन के सामाजिक, आर्थिक स्थिति म सकारात्मक बदलाव आए, उंकर आय बढ़े।

मुख्यमंत्री ह संसदीय समिति ले प्रदेस के अनुसूचित क्षेत्र म कोल माईंस म उत्खन्न के बाद खाली खदान के जमीन राज्य सरकार के वापस कराये के गेलौली करत किहिन के राज्य सरकार ये क्षेत्र म वाटर बॉडी बनाके टूरिज्म के गतिविधी के बढ़ावा दे के खातिर विकास बुता करना चाहत हावय।

मुख्यमंत्री ह बस्तर क्षेत्र म लोगन के सुगम यातायात के सुविधा उपलब्ध कराये के खातिर रावघाट-जगदलपुर तक रेल लाईन के विस्तार कराये के गेलौली करिन। इही रकम ले ओमन मुंबई-कोलकाता रेल रूट सहित आने-आने रेल रसता म छत्तीसगढ़ ले गुजरे वाला रेल जेकर परिचालन बंद कर दे गे रिहिस, ओला फेर ले सुरू कराये के खातिर जरूरी पहल करे के गेलौली करिन। मुख्यमंत्री ह केन्द्रीय संसदीय समिति के सदस्य मन के बताइन के छत्तीसगढ़ के लगभग 44 परतिसत भू-भाग म वन हावयं। एमे अनुसूचित क्षेत्र म सघन वन हावयं, ए सेती इहां आने-आने विकास बुता म दिक्कत आत हावय। बघेल ह ए संदर्भ म वन अधिनियम के प्रावधान म संशोधन के जरूरत  बतात वन अधिनियम के प्रावधान म जरूरी संशोधन के खातिर पहल के गेलौली समिति ले करिन।

मुख्यमंत्री ले मुलाकात के बखत केन्दीय संसदीय समिति के जगन्नाथ सरकार, नीरज डांगी, डॉ. व्ही. शिवदासन, कामाख्या प्रसाद, वीरेन्द्र कुमार तको उपस्थित रिहिस। डॉ. (प्रो.) किरीट प्रेमजीभाई सोलंकी के अध्यक्षता म 31 सदस्यीय संसदीय दल के छत्तीसगढ़ के मुख्य सचिव अउ वरिष्ठ  अधिकारी मनके संग बइठक होही। येकर अलावा संसदीय दल आने-आने संस्थान के संग बइठक करके अनुसूचित जाति अउ जनजाति के प्रतिनिधित्व अउ उंकर खातिर करे  जात कल्याणकारी उपाय के संबंध म गोठबात करही।