छत्तीसगढ़ म होइस रिकार्ड तोड़ धान खरीदी, मुख्यमंत्री भूपेश बघेल अउ खाद्य मंत्री अमरजीत भगत ह नवा उपलब्धि खातिर किसान मनला दीस बधाई

छत्तीसगढ़ म होइस रिकार्ड तोड़ धान खरीदी

अंजोर.रायपुर। छत्तीसगढ़ राज्य बने के बाद अब तक सबले जादा धान खरीदी चालू खरीफ सीजन म होए हावय। राज्य म समर्थन कीमत म धान खरीदी के पिछला रिकार्ड तको टूटगे हावय। 16 जनवरी 2023 तक 98.92 लाख मीट्रिक टन धान के खरीदी हो चुके हावय। जबकि पाछु साल 2021-22 म 98 लाख मीट्रिक टन धान के खरीदी होए रिहिस। धान खरीदी के ये आकड़ा अउ बाढ़ही। धान खरीदी 31 जनवरी 2023 तक चलही।

मुख्यमंत्री भूपेश बघेल अउ खाद्य मंत्री अमरजीत भगत ह राज्य के किसान मनला ए नवा उपलब्धि के खातिर बधाई अउ सुभकामना दीस हावयं। ओमन किहिन के किसान हितैषी फैसला अउ न्याय योजना मनले किसान मनके जेब म सोज पइसा आइस, येकर ले किसान मन के समृद्धि के संग ग्रामीण अर्थव्यवस्था मजबूत होए हावय।

राज्य सरकार ह चालू खरीफ सीजन म 110 लाख मीट्रिक टन धान खरीदी के लक्ष्य रखे हावय। धान खरीदी केन्द्र म दिखत किसान मन के चहल-पहल अउ धान के आवक ले ये अनुमान हावय के ये लक्ष्य आसानी ले मिल जाही।मुख्यमंत्री भूपेश बघेल के अगुवई म 1 नवम्बर ले सुरू होए धान खरीदी के महाभियान सरलग जारी हावय। राज्य के 22.32 लाख किसान मन ह धान बेचे हावय। धान के एवज म ये किसान मन के 20,375 करोड़ रूपिया के भुगतान बैंक लिंकिंग बेवस्था के तहत करे गे हावय। पाछु साल के रकम ले ए साल तको धान खरीदी के संग कस्टम मिलिंग के खातिर सरलग धान के उठाव जारी हावय। अब तक कुल धान खरीदी 98.92 लाख मीट्रिक टन धान म ले 84.62 लाख मीट्रिक टन धान के उठाव के खातिर डीओ जारी करे गे हावय, जेकर विरूद्ध मिलर्स डहर ले 75 लाख मीट्रिक टन ले जादा धान के उठाव कर लिस हावय।

जानबा होवय के राज्य सरकार के किसान हितैषी फैसला ले ये चार साल म सरलग किसान मन के पंजीयन म बड़वार होए हावय। ए साल 24.96 लाख किसान मन ह पंजीयन कराये हावय, एमे 2.30 लाख नवा किसान हावयं। राज्य सरकार डहर ले ए सीजन म 110 लाख मीट्रिक टन धान खरीदे के अनुमान लगाये गे हावय। किसान मन के धान बेचे म सहुलियत हो ए हिसाब ले राज्य म 2617 धान उपार्जन केन्द्र बनाए गे हावयं।

खाद्य विभाग के  अधिकारी मन बताइन के 16 जनवरी के 30 हजार 461 किसान मनले 1.24 लाख मीट्रिक टन धान के खरीदी करे गे हावय। ऑनलाइन मिले टोकन के जरिए किसान मन ले 09 हजार टन धान के खरीदी होए हावय।  अधिकारी मन बताइन के ए खरीफ सीजन म सामान्य धान 2040 रूपिया प्रति क्विंटल अउ ग्रेड-ए धान 2060 रूपिया प्रति क्विंटल के दर ले खरीदे जात हावय। इही रकम ले राज्य म धान खरीदी के बेवस्था म कड़ी निगरानी रखे जात हावय। सीमावर्ती राज्य ले धान के अवैध परिवहन ल रोके के खातिर चेक पोस्ट म माल वाहक के चेकिंग करे जात हावय।