करमा एथनिक रिसॉर्ट अउ जोहर मोटल के होइस लोकार्पण, मैनपाट म होम स्टे ल मिलही बढ़ावा : पर्यटन मंत्री ताम्रध्वज साहू

करमा एथनिक रिसॉर्ट अउ जोहर मोटल के होइस लोकार्पण

अंजोर.मैनपाट। छत्तीसगढ़ शासन के पर्यटन, लोक निर्माण, गृह, जेल अउ धर्मस्व मंत्री ताम्रध्वज साहू के मुख्य आतिथ्य अउ खाद्य मंत्री अमरजीत भगत के अध्यक्षता म सुकवार के मैनपाट के कमलेश्वरपुर म आयोजित समारोह म करमा एथनिक रिसॉर्ट अउ जोहर मोटल सोनतराई के लोकार्पण होइस। समारोह के सुरू छत्तीसगढ़ महतारी के छायाचित्र के तीर दीप प्रज्ज्वलन अउ राजगीत के संग करे गिस। स्वदेश दरसन योजना ले 21 करोड़ रूपिया के लागत ले बने करमा एथनिक रिसॉर्ट म पर्यटक के रूके के सुविधा के संग इहां के जनजाति परंपरा, स्थानीय अउ तिब्बती संस्कृति ल करीब ले जाये समझे के मउका मिलही। ए मउका म पहुना मन ह एथनिक रिसॉर्ट के भ्रमण करके अवलोकन तको करिन।

समारोह के संबोधित करत पर्यटन मंत्री ताम्रध्वज साहू ह किहिन के करमा एथनिक रिसॉर्ट के लोकार्पण ले मैनपाट म पर्यटक के सुविधा के विस्तार म एक अउ कड़ी जुड़गे जेन पर्यटन विकास म एक अच्छा आयाम साबित होही। ए रिसॉर्ट के सुरू होए ले पर्यटक इहां रुकेंगे जेकर ले मैनपाट म होम स्टे ल बढ़ावा मिलही। स्थानीय लोगन के  रोजगार मिलही। इहाँ के हस्तशिल्प के मार्केट मिलही। ओमन किहिन के हम ए रिसॉर्ट के माध्यम ले पर्यटक के प्रकृति के लकठा ले देखे के मउका देना चाहत हावयं। छत्तीसगढ़ पर्यटन मंडल प्रदेस म पर्यटन सुविधा बढ़ाये के खातिर सरलग प्रयास करत हावय। अब त प्रदेस म पर्यटन नीति तको बन चुके हावय जेकर ले पर्यटन एक उद्योग के रूप म स्थापित हो सकत हावय। जेन तको ए क्षेत्र म काम करे चाही ओला सुविधा दे जाही।

ए मउका म खाद्य मंत्री अमरजीत भगत ह किहिन के आज मैनपाट के विकास अउ सुविधा म एक अउ अध्याय जुड़ गे। मुख्यमंत्री भूपेश बघेल के सोच के मुताबिक प्रदेस म पर्यटन के आगू बढ़ाये के काम करे जात हावय। ओमन किहिन के मैनपाट के खूबसूरती अतका हावय के मैनपाट के नाम सुनते ही लोगन के चेहरे खिल उठते हावयं। इहाँ के खूबसूरती, हरियाली, संस्कृति एक धरोहर हावय जेला बचा करके रखना हावय। ओमन किहिन के इहां के प्राकृतिक सुंदरता अउ पर्यटन जगह के विकास होही त पर्यटक के संख्या म बड़वार होही। सबो पर्यटन पॉइंट तक पहुंच रद्दा दुरुस्त करे होही।

संसदीय सचिव अउ रायपुर पश्चिम के विधायक विकास उपाध्याय ह किहिन के  मैनपाट के अपन प्राकृतिक छटा के सेती आने पहचान हावय। छत्तीसगढ़ म कुदरत के अपार आशीर्वाद हावय। प्राकृतिक संसाधन भरपूर हावय। मुख्यमंत्री भूपेश बघेल के सोच के मुताबिक प्रदेस के सुंदर बनाये के काम जारी हावय। 

छत्तीसगढ़ पर्यटन मंडल के अध्यक्ष अटल श्रीवास्तव ह किहिन के मैनपाट के छत्तीसगढ़ के शिमला किहिन जाथे । मैनपाट प्रदेस के आन हिल स्टेशन ले आने हावय। इहां के जलजली अउ उल्टा पानी देश दुनिया म अनूठा हावय। प्रदेस म पर्यटन सर्किट बनाये जाही रायपुर ले उत्तर के तनि सतरेंगा, मैनपाट अउ जशपुर के जोड़ा जाही जेन पर्यटको के खातिर 3 रतिहा अउ 4 दिन के पूरा पैकेज होही।

ए मउका म सीजीएमएससी के अध्यक्ष अउ लुण्ड्रा विधायक डॉ प्रीतम राम, खाद्य आयोग के अध्यक्ष गुरप्रीत सिंह बाबरा, श्रम कल्याण मंडल के अध्यक्ष शफी अहमद,  बीस सूत्रीय कार्यक्रम क्रियान्वन समिति के उपाध्यक्ष अजय अग्रवाल, तेल घानी बोर्ड के सदस्य लक्ष्मी गुप्ता, पर्यटन मंडल के उपाध्यक्ष श्रीमती चित्ररेखा साहू सहित आन जनप्रतिनिधि, अधिकारी-कर्मचारी अउ बड़े संख्या म ग्रामीण उपस्थित रिहिस।