सोनाली सहारे के अवइया छत्तीसगढ़ी धार्मिक फिल्म 'जय शीतला मईया'

सिनेमा। छत्तीसगढ़ी सिनेमा के लोकप्रिय अदाकारा सोनाली सहारे ल आपमन परब-तिहार के मउका म माता के रूप म देखे होहू। ओमन सोशल मीडिया के इंस्टाग्राम अउ फेसबूक म कभू मां दुर्गा, कभू मां काली, कभू मां लक्ष्मी के रूप म फोटोशूट कराके पोस्ट करय। सोनाली सहारे फोटो म साक्षात माता के रूप दिखे। अब सिरतोन म ओमन धार्मिक फिल्म अभिनय करत दिखही 'जय शीतला मईया' म। मिले आरो के मुताबिक ये फिल्म पूरा होगे हावय, अउ दर्शक मनके संग कलाकार मनला तको रिलीज के अगोरा हाबे। फिल्म प्रोडक्शन कोति ले येकर पहिली पोस्टर शानदान लॉचिंक तको करे गे रिहिस, जेन ल सोशल मीडिया म खूब पसंद करे गिस।

कलांकन फिल्म के बैनर म बने जय शीतला मईया के ​निर्माता हावय लिलेश्वर सिन्हा अउ मीनाक्षी शुक्ला, फिल्म के निर्देशन करे हाबे डा. पुनित सोनकर ह। छत्तीसगढ़ी म धार्मिक फिल्म बहुत कम बने हावय। वीडियो फिल्म के छोड़ बड़े पर्दा म जय मां बम्लेश्वरी अउ जय मां महामाया के बाद अब जय शीतला मईया जन जन म बगरही। माता शीतला छत्तीसगढ़ के गांव-गांव म बिराजे हाबे। माता शीतला गांव के रक्षक देवी माने जाथे। फिल्म ह काफी लोकप्रियता पाही अउ सफलता के नवा कीर्तिमान बनाही।

फिल्म म अहम किरदार म हाबे लिलेश्वर सिन्हा, सोनाली सहारे, उर्वशी साहू, प्रदीप शर्मा, अनुराधा दुबे, संजय मैथिल, तेजराम साहू, जागेश्वरी मेश्राम, संध्या मानिक, घनश्याम वर्मा आदि।