अंजोर.बालोद। कलेक्टर कुलदीप शर्मा के मार्गदर्शन म जिला प्रशासन के डहर ले निवेशक डहर ले चिटफंड कंपनी म जमा करे गे रकम ल वापस देवाये बर सरलग कार्रवाई करे जात हावय। अनुविभागीय अधिकारी राजस्व गुरूर के डहर ले वित्तीय कंपनी सनसाईन हाईटेक इन्फ्राकन लिमिटेड के रमेशचंद्र नायक अउ आन एक के म गुरूर तहसील के गांव बालोदगहन म पटवारी हल्का नम्बर 29 म के भूमि ख०नं० 391/1 रकवा 0.62 हेक्टेयर अचल सम्पत्ति के नीलामी के कार्रवाई करे गिस।
जानबा होवय के ये भूमि के निलामी के कार्यवाही करे बर समाचार पाती म ईश्तहार तको प्रकाशित कराये रिहिस। ईश्तहार प्रकाशन पाछु नियत समय तक कुल 46 लोगन के आवेदन पत्र, डिमांट डाप्ट, शपथ पत्र, आधार कार्ड, पेन कारड के छाया प्रति, तीन साल के आयकर रिपोर्ट पेश करे गिस। तहसीलदार गुरूर ह बताइन के 07 नवम्बर के वित्तीय कंपनी सनसाईन हाईटेक इन्फ्राकन लिमिटेड के अचल संपत्ति के निलामी के बखत गांव बालोदगहन म कुल 46 आवेदन करइया म ले कुल 43 आवेदन करइया उपस्थित होइस अउ 03 आवेदन करइया अनुपस्थित रिहिन। ये सबो लोगन के मउजूदगी म मउका म नीलामी के कार्यवाही करे गे।
जेमा उच्चतम बोलीदार पवन कुमार सिन्हा डहर ले कुल रकम एक करोड़ चालिस लाख रूपिया आखरी बोली होइस अउ दूसरइया बोलीदार के रूप आशीष अग्रवाल डहर ले एक करोड़ उनचालिस लाख रूपिया लगाये गिस। जेमा उच्चतम बोलीदार पवन कुमार सिन्हा ल आखरी बोलीदार माने गिस। ए कार्यवाही के बखत तहसीलदार, गुरुर डहर ले अनुविभागीय अधिकारी(रा.) गुरूर के उपस्थिति म गांव पंचायत भवन बालोदगहन म संपादित करे गिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।