अंजोर.रायपुर। भारत के पहिली प्रधानमंत्री पंडित जवाहर लाल नेहरु के जंयती 14 नवम्बर के बाल दिवस के रूप म मनायी जाही। मुख्यमंत्री भूपेश बघेल राजधानी रायपुर के साइंस कॉलेज परिसर के दीनदयाल उपाध्याय ऑडिटोरियम म बिहनिया 11.30 बजे बाल दिवस समारोह ल सुरू करही। कार्यक्रम के अध्यक्षता स्कूल शिक्षा मंत्री डॉ. प्रेमसाय सिंह टेकाम करही अउ संसदीय सचिव यादव अउ विकास उपाध्याय, महापौर नगर पालिक निगम रायपुर एजाज ढेबर, विधायक सत्यनारायण शर्मा अउ कुलदीप जुनेजा विशिष्ट पहुना के रूप म सामिल होही।
प्रबंध संचालक समग्र शिक्षा नरेन्द्र कुमार दुग्गा ह बताइन के बाल दिवस समारोह ल संचालक स्कूल लइका डहर ले करे जाही। बस्तर अउ सरगुजा क्षेत्र के लइका अपन कला के प्रदर्शन करही। कार्यक्रम म आने-आने गतिविधी म अग्रणी रहइया लइका के सम्मान होही। ए मउका म स्कूल शिक्षा विभाग के गतिविधी ले संबंधित प्रदर्शनी तको लगाये जाही। प्रदर्शनी म बालवाड़ी के माध्यम ले लइका ल सीखना, बहुमुखी प्रतिभाशाली लइका डहर ले प्रस्तुतिकरण, विशिष्ट जरूरत वाला लइका के शिक्षा, लइका डहर ले कुशल वाचन मौखिक गणित के प्रदर्शन, खिलौना ले सीखना अंगना म शिक्षा, व्यावसायिक शिक्षा के ले लइका डहर ले तइयार सामान के प्रदर्शन, आने-आने कौशल म दक्ष कुशल लइका के प्रस्तुतिकरण, गणित अउ विज्ञान क्लब के माध्यम ले आने-आने गतिविधी के प्रस्तुतिकरण, स्वामी आत्मानंद उत्कृष्ट योजना ले अंग्रेजी, हिन्दी माध्यम स्कूल के लइका डहर ले स्कूल म करे जात गतिविधी के प्रदर्शन, शारीरिक विकास आत्मरक्षा के खातिर नोनी मन के प्रदर्शन, स्थानीय भाषा म शिक्षा अउ संविधान ले परिचय उक विषय के लगभग एक दर्जन स्टॉल लगाये जाही। ये स्टॉल के अगुवई तको लइका डहर ले करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।