समाज सुधारक, विचारक अउ दार्शनिक महात्मा ज्योतिबा फुले के पुण्यतिथि 28 नवम्बर समता दिवस म मुख्यमंत्री भूपेश बघेल करिस नमन

अंजोर.रायपुर। मुख्यमंत्री भूपेश बघेल ह समाज सुधारक, विचारक, लेखक अउ दार्शनिक महात्मा ज्योतिबा फुले के पुण्यतिथि 28 नवम्बर समता दिवस के मउका म ओला नमन करिन। श्री बघेल ह किहिन के महात्मा फुले समाज के अंधविश्वास अउ कुप्रथा ले मुक्त करना चाहत रिहिस। वो भारतीय समाज म प्रचलित जाति बेवस्था अउ वो म आधारित भेदभाव के प्रबल विरोधी रिहिस। ओमन महिला मन अउ दलित के उत्थान के खातिर कई बुता करिस। दलित के प्रति भेद-भाव खतम करके ओला समाज म ठऊर देवाये के खातिर महात्मा फुले ह सत्यशोधक समाज के स्थापना करिस।

श्री बघेल ह किहिन के महात्मा फुले ह समाज के कुरीति ले मुक्ति देवाये के खातिर  सबो वर्ग के शिक्षा म बल दीस। ओमन महिला शिक्षा के तको बढ़ावा दे अउ अपन धर्मपत्नी श्रीमती सावित्रीबाई फुले ल शिक्षा दीस, जेन भारत के पहिली अध्यापिका बनीं। मुख्यमंत्री ह किहिन के महात्मा ज्योतिबा फुले के सेवा भावना अउ विचार कीमत हमन ल सदा दीन-दुखी के सेवा अउ समाज म समता स्थापित करे के खातिर प्रेरित करत रइही।