बस्तर फाइटर्स के नियुक्ति के संग ही बस्तर म शांति-सुरक्षा अउ विकास के नवा युग के होए शुरुआत : मुख्यमंत्री भूपेश बघेल

अंजोर.रायपुर। मुख्यमंत्री भूपेश बघेल अपन एक दिवसीय बस्तर प्रवास के बखत जगदलपुर के लालबाग के सशस्त्र पुलिस प्रशिक्षण स्कूल पहुंचिस, इहां ओमन बस्तर फाइटर्स के नवनियुक्त आरक्षक ले मुलाकात करिस। ओमन आरक्षक ल सुभकामना देत किहिन के बस्तर म शांति-सुरक्षा के संग बस्तर के चहुंमुखी विकास म योगदान देना फाइटर्स के खातिर एक बड़े जिम्मेदारी होही अउ पूरा विश्वास हावय के बस्तर के युवा ए जिम्मेदारी के बखूबी निभाही। ओमन आगू किहिन के बस्तर पहिली म ही शांति के टापू के नाम ले जाने, फेर लाल आतंक के सेती इहां विकास के प्रक्रिया थम गे रिहिस।

आज परिस्थिति बदल गे हावयं अउ नक्सलवाद काफी हद तक सिमट गे हावय। अब लघियात ही ये अपन शांति के टापू के नाम के सार्थक करही। बस्तर के युवा मन के मुख्य धारा म लाने के खातिर राज्य शासन डहर ले बस्तर फाइटर्स के नियुक्ति करे गे हावय, जेमा संभाग के सबो जिला के युवा मन के मउका मिले  हावय। बस्तर संभाग के सबो जिला  के स्थानीय युवा मन के भरती के खातिर 2100 पद के सिरजन करे गिस। स्थानीय युवा मन के नियुक्त करे के प्रमुख उद्देश्य जनता के बीच विश्वास कायम करे रिहिस। अब ये युवा मन के आत्मविश्वास, जोश अउ जुनून देखके बहुत खुशी होत हावय। पाछु साल म बस्तर म विकास के एक नवा बयार चले हावय अउ राज्य शासन ह बस्तर के विकास के अब सर्वोच्च प्राथमिकता म रखके इहां शिक्षा, स्वास्थ्य अउ बुनियादी ढांचे म पूरा धियान दे हावय, जेकर सेती गांव वाला म शासन के प्रति एक नया विश्वास, नया भरोसा पैदा होइस हावय।

ए मउका म अध्यक्ष बस्तर क्षेत्र आदिवासी विकास प्राधिकरण लखेश्वर बघेल, संसदीय सचिव रेखचंद जैन, अध्यक्ष छत्तीसगढ़ हस्तशिल्प विकास बोर्डचंदन कश्यप, उपाध्यक्ष बस्तर क्षेत्र आदिवासी विकास प्राधिकरण विक्रम मंडावी, अध्यक्ष मछुआ कल्याण बोर्डएम.आर.निषाद, अध्यक्ष छत्तीसगढ़ अक्षय ऊर्जा विकास अभिकरण मिथिलेश स्वर्णकार, विधायक चित्रकोट राजमन बेंजाम, विधायक कोंडागांव मोहन मरकाम, महापौर श्रीमती सफीरा साहू, सभापति नगर पालिक निगम श्रीमती कविता साहू सहित कमिश्नर बस्तर श्याम धावड़, पुलिस महानिरिक्षक सुंदरराज पी, बस्तर कलेक्टर चंदन कुमार, वरिष्ठ पुलिस अधीक्षक जितेंद्र मीणा सहित क्षेत्र के जनप्रतिनिधि अउ नव आरक्षक उपस्थित रिहिन।