अंजोर.कांकेर। छत्तीसगढ़ सरकार के बड़का योजना ने जिला के गउठान म आने-आने आयमूलक नवाचार करे जात हावय। जिला प्रशासन के मुताबिक गउठान म वर्मी खातु के उत्पादन करके ओकर बेचे जात हावय, संग ही समूह के महिला मन डहर ले मछली पालन, दाल मिल संचालन अउ सब्जी के उत्पादन करके अच्छा आमदनी होवत हावयं। विकासखंड भानुप्रतापपुर के गांव चिल्हाटी के आदर्श गउठान म जय मां लक्ष्मी स्वसहायता समूह के महिला मन डहर ले कुकरी पालन करके अंडा उत्पादन इकाई के संचालन करे जात हावय।
चिल्हाटी गउठान म समूह के महिला मन डहर ले अंडा उत्पादन कुकरी के पाले अउ अंडा उत्पादन के खातिर केज बनाये गे हावय, केज म अंडा उत्पादन के खातिर अभी के बेरा म 180 कुकरी रखे गे हावय। पशु चिकित्सा अधिकारी डॉ. विजया नागवंशी अउ सहायक पशु चिकित्सा अधिकारी टीकम ठाकुर डहर ले समय-समय म मॉनिटरिंग करके स्व-सहायता समूह के महिला मनला प्रोत्साहित करे जात हावय।
’महिला सशक्तिकरण के जरिया बनत हाबे गोधन न्याय योजना’
गोधन न्याय योजना महिला स्व-सहायता समूह के महिला मनके खातिर सशक्तिकरण के जरिया बनत हावय। गउठान म अंडा उत्पादन इकाई के संचालन करइया महिला मन गनेशिया, बबिता, रेमन, बसंताबाई, मालती अउ भारती ह बताइन के उत्पादित अंडा ल बेचे म कोनो दिक्कत नइ होवे। कुकरी ले रोज दिन 100 नग ले ऊपर अंडे मिलत हावयं, महज 10 दिन म 1 हजार अंड ल बेचे ले 6 हजार के आय मिले हावय। ग्रामीण कृषि विस्तार अधिकारी प्रवीण कवाची ह बताइन के चिल्हाटी गउठान के महिला समूह ए बुता के लगन ले करत हावयं, आगू तको मुर्गीपालन करके अंडा उत्पादन इकाई के बढ़ाये के विचार करे जात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।