मुख्यमंत्री भूपेश बघेल ह प्रदेस म जुआ-सट्टा म रोक लगाये खातिर डीजीपी ल दीस निर्देश

अंजोर.रायपुर। प्रदेश म जुआ अउ सट्टा जइसे सामाजिक बुराई ल खतम करे खातिर मुख्यमंत्री भूपेश बघेल ह पुलिस महानिदेशक अशोक जुनेजा ल कड़ा कदम उठाये के  निर्देश दे हावयं। मुख्यमंत्री ह प्रदेस म जुआ-सट्टा के विविध स्वरूप अउ प्लेटफार्म म प्रभावी रोक लगाये के कड़ा कदम उठाये के खातिर जरूरी प्रावधान अउ प्रक्रिया के प्रारूप बनाये के निर्देश दे हावयं जेकर आधार म जुआ सट्टा के रोकथाम के खातिर कड़ा कानून बनाए जा सकही।

छत्तीसगढ़ सरकार जुआ अउ सट्टा के सामाजिक बुराई ल लेके पहिली ही बहुत सख़्त हावय, ए म ठोस रोकथाम के खातिर साफ निर्देश तको दे गे हावयं। राज्य के पुलिस जुआ अउ सट्टा ल रोके के दिशा म सरलग कार्रवाई करत हावय। कार्रवाई ले बांचे के खातिर जुआ सट्टा के अवैध कारोबार म सामिल लोगन डहर ले तकनीक के सहारा लेके केऊ रकम ले ऑनलाईन जुआ सट्टा कारोबार संचालित करे जाये लगे हावय, ऑनलाइन चले वाला ये कारोबार सरलग बढ़त जात हावय।

ऑनलाइन संचालित होत जुआ अउ सट्टा के विरुद्ध कोनो विधिक प्रावधान अउ साफ कार्रवाई के प्रकिया नइ होए ले ये म प्रभावी रूप ले रोक नइ लगाये जा पात हावय, ए दिशा म कड़ी कार्रवाई हो सके इही सेती जुआ अउ सट्टा म प्रभावी रोक लगाये के खातिर मुख्यमंत्री बघेल ह जरूरी विधिक प्रावधान अउ प्रक्रिया ल प्रारूप जल्दीर तइयार करे के निर्देश दे हावयं।