‘हमर तिरंगा’ थीम म मूक बधिर स्कूल के पढ़ईया मन बनाइस सुघ्घर पेंटिंग

अंजोर.रायपुर। आजादी के अमृत महोत्सव के तहत 11 ले 17 अगस्त तक ‘हर घर तिरंगा‘ अभियान के तहत छत्तीसगढ़ राज्य म जन-जन के भागीदारी दिखत हावय। इही कड़ी म बिते दिन रायपुर के मठपुरैना सरकारी मूकबधिर स्कूल के नोनी-बाबू मन ह ‘हमर तिरंगा’ थीम अउ आन विषय म गजब आकर्षक पेंटिंग बनाईस। ये पढ़ईया मन के दू वर्ग म पहला, दूसरा अउ तीसरा पुरस्कार देके सम्मानित करे गिस। स्कूल के सबो भाग लेवइया लइका ल सांत्वना पुरस्कार दे गिस।

प्रतियोगिता म हाई स्कूल अउ उच्चतर माध्यमिक वर्ग म पहिली ठऊर  कृष्णा साहू, दूसरइया पुरस्कार दुर्गेश कौशिक अउ तीसरा पुरस्कार लुकेश्वर ह पाइन। माध्यमिक अउ प्राथमिक वर्ग म पहिली ठऊर  गगन साहू, दूसरइया पुरस्कार चित्रांश अउ तीसरा पुरस्कार युगेश ह पाइस। प्रतियोगिता म भाग ले वाला दृष्टिबाधित कुशल निषाद ल तको सम्मानित करे गिस। ए मउका म स्कूल के प्रभारी अधीक्षक त्रिपाठी, सेवानिवृत्त मुख्य चिकित्सा अउ स्वास्थ्य अधिकारी डॉ. आर.एस. गुप्ता अउ स्कूल के स्टाफ, ड्राइंग शिक्षक अउ पढ़ईया उपस्थित रिहिस।