मरीज मनके खातिर ‘दाई कोरा‘ बनाना सहराये के लइक बुता : मुख्यमंत्री भूपेश बघेल

अंजोर.रायपुर। मुख्यमंत्री भूपेश बघेल ह मुख्य चिकित्सा स्वास्थ्य अधिकारी कार्यालय म मरीज मनके खातिर दान स्वरूप बने आश्रय भवन ‘दाई कोरा‘ सुरू करिन। मुख्यमंत्री बघेल ह दानदाता के सराहना करत किहिन के ये मानव समाज के हित म प्रशंसनीय अउ अनुकरणीय बुता हावय। ओमन आश्रय भवन दाई कोरा म रूकइया मरीज के घर वाला के खातिर भोजन के बेवस्था तको सुनिश्चित करे बर किहिन।

जानबा हावय के भरत वर्मा जी अउ गंगोत्री वर्मा जी डहर ले अपन नोनी स्वर्गीय श्रीमती गुंजन बघेल अउ पुत्र स्वर्गीय राकेश वर्मा के सुरता म डी. के. एस. अस्पताल म आने वाला मरीज मनके घर वाला के रूके के बर अउ विश्राम बर 12 बिस्तर के ‘दाई कोरा‘ नाम ले आश्रय भवन बनाये हावय। ये भवन सर्व-सुविधायुक्त हावय, जेमा पीये के पानी बर आर.ओ. फिल्टर युक्त स्वच्छ जल के बेवस्था हावय। येकर संग ही सरी सुविधावाला महिला अउ पुरुष कक्ष बनाये गे हावय। जेमा महिला मन बर 06 खटिया अउ आदमी बर 06 खटिया हावय। जेमा अलग ले सबोच इकाई म अटैच रूम म नहाने बर बाथरूप अउ टायलेट के बेवस्था हावय। येकर संग ही गर्मी ले राहत बर कूलर के बेवस्था तको करे हावय।

येकर संग ही ए भवन के प्रथम तल म चिकित्सक अउ पैरामेडिकल विभागीय  अधिकारी अउ कर्मचारी के प्रशिक्षण बर कक्ष बनाये गे हावय। ए भवन के कुल लागत 45.50 लाख हावय। जेला स्वयं भरत वर्मा जी डहर ले अपन व्यय म कराये गे हावय। स्वास्थ्य अउ परिवार कल्याण विभाग, रायपुर के मुख्य चिकित्सा अउ स्वास्थ्य अधिकारी डॉ. मीरा बघेल ह भरत वर्मा अउ श्रीमती गंगोत्री वर्मा के प्रति आभार प्रकट करिन।