केन्द्रीय ग्रंथालय ले प्रतियोगी युवा मनला होही गजब फायदा : मुख्यमंत्री श्री बघेल

अंजोर.रायपुर। मुख्यमंत्री भूपेश बघेल ह राजधानी के शंकर नगर म सरकारी केंद्रीय ग्रन्थालय के खातिर अकताहा भवन बनाये के भूमिपूजन अउ केंद्रीय ग्रन्थालय के तीसरा तल म सेमिनार हाल के बनाये के लोकार्पण करिन। 3 करोड़ रूपिया के लागत ले  केंद्रीय ग्रन्थालय के खातिर बने अकताहा भवन म 394 मनखे मन के बइठे के बेवस्था हावय। इही रकम ले एक करोड़ 7 लाख रूपिया ले बने केंद्रीय ग्रन्थालय भवन के तीसरा तल म सेमिनार हाल म 300 व्यक्ति के खातिर बइठक बेवस्था करे गे हावय।

मुख्यमंत्री भूपेश बघेल ह ए मउका म सबो के स्वतंत्रता दिवस के अग्रिम बधाई देत किहिन के आज शंकरनगर के केंद्रीय ग्रंथालय के तीसरा तल म बने सेमिनार हॉल के लोकार्पण अउ अकताहा भवन बनाये के खातिर भूमिपूजन होइस। शंकरनगर के ये लाइब्रेरी रायपुर के पढ़इया लइका अउ पुस्तक-प्रेमी के खातिर बहुत उपयोगी अउ लोकप्रिय हावय। येकर ले पढ़इया लइका के प्रतियोगी परीक्षा म जादा ले जादा लाभ मिलही। 

जानबा होवय के ए ग्रंथालय म प्रतियोगी परीक्षा, हिंदी साहित्य, अंग्रेजी साहित्य, छत्तीसगढ़ी साहित्य, महिला साहित्य, विज्ञान, कला, संस्कृति, विधि, वाणिज्य अउ प्रबंधन, इंजीनियरिंग अउ लइका के खातिर उपयोगी करीब 7 हजार किताब के संग्रह हावय।  अधिकारी मन बताइन के ग्रंथालय म लगभग 3 हजार पाठक ह पंजीयन कराइन हावय। एमे ले 700 पाठक ग्रंथालय के सेवा के लाभ उठात हावयं। हर रोज करीब 300 पाठक ए ग्रंथालय के उपयोग करत हावयं। ए ग्रंथालय के सुरू ले अब तक लगभग 19 युवा मन के चयन आईएफएस, डिप्टी कलेक्टर, डीएसपी, सहायक संचालक, नायब तहसीलदार, बैंक प्रबंधक अउ सीए जइसे उच्च पद के खातिर होइस। शहर के बीच म ए लाइब्रेरी के तीन मंजिला भवन म रीडिंग जोन के संग वरिष्ठ नागरिक कार्नर, चिल्ड्रन कार्नर, रिसर्च सेक्शन अउ ई-लाइब्रेरी के तको सुविधा हावय। ए लाइब्रेरी के तीसरा तल म नवा बने भव्य आडिटोरियम पूरा होए के बाद येकर उपयोग सेमिनार के आयोजन अउ आने-आने गतिविधी के खातिर करे जा सकही, येकर ले पढ़इया लइका अउ पाठक ल लाभ होही। ए लाइब्रेरी म पाठक के सरलग बाढ़त संख्या ल देखत परिसर म उपलब्ध भूमि म अकताहा दू मंजिला भवन के बनाये करे के फइसला लिस हावय। स्कूल शिक्षा विभाग ए लाइब्रेरी के जादा ले जादा समृद्ध अउ सुविधायुक्त बनाये के खातिर प्रतिबद्ध हावयं।

युवा मनह मुख्यमंत्री के संग लिस सेल्फी मुख्यमंत्री ह केन्द्रीय ग्रंथालय म प्रतियोगी परीक्षा के तइयारी म जुटे युवा मन ले ग्रंथालय म मिलत सुविधा के बारे म विस्तार ले जानकारी लिस। युवा मन ह बताइन के इहां म बहुत ही उपयोगी पुस्तक हावय। ए बखत मुख्यमंत्री बघेल के संग सेल्फी ले के खातिर युवा मन म होड़ लगे रही। कार्यक्रम म विधायक सत्यनारायण शर्मा, विधायक कुलदीप जुनेजा, रायपुर महापौर एजाज ढेबर अउ सभापति प्रमोद दुबे, बिसेस सचिव स्कूल शिक्षा डॉ. एस. भारतीदासन, कलेक्टर डॉ सर्वेश्वर नरेंद्र भुरे, संचालक लोक शिक्षण सुनिसल जैन सहित लोक शिक्षण अधिकारी-कर्मचारी उपस्थित रिहिस।