 |
| Rajiv Gandhi Kisan Nyay Yojana |
अंजोर.रायपुर। मुख्यमंत्री भूपेश बघेल 20 अगस्त सनिच्चर के पूर्व प्रधानमंत्री भारत रत्न स्वर्गीय राजीव गांधी जी के जयंती के मउका म राज्य के किसान मन, पशुपालक गांव वाला, गउठान समिति मन अउ महिला स्व-सहायता समूह के 1750 करोड़ 24 लाख रूपिया के रकम उंकर बैंक खाता म ऑनलाइन जारी करही। ये रकम छत्तीसगढ़ सरकार के राजीव गांधी किसान न्याय योजना अउ गोधन न्याय योजना के तहत दे जाही। मुख्यमंत्री निवास कार्यालय म आयोजित कार्यक्रम के बखत मुख्यमंत्री भूपेश बघेल वर्चुअल रूप ले राज्य के जनप्रतिनिधी मन, किसान मन, गौपालक अउ समूह के महिला मन ले गोठबात करही।
राजीव गांधी किसान न्याय योजना के तहत 20 अगस्त के राज्य के 26 लाख 21 हजार किसान मनके ए साल के इनपुट सब्सिडी के दूसर किस्त के रूप 1745 करोड़ रूपिया के रकम उंकर बैंक खाता म ट्रांसफर करे जाही। येकर ले पहिली 21 मई 2022 के राज्य के किसान मन के ए योजना के पहिली किस्त के रूप म 1745 रूपिया के भुगतान करे गिस। राजीव गांधी किसान न्याय योजना छत्तीसगढ़ खरीफ साल 2019 ले लागू करे हावय।
ए योजना के तहत अब तक किसान मन के 12 हजार 920 करोड़ रूपिया के इनपुट सब्सिडी दे जा चुके हावय। 20 अगस्त के दूसरइया किस्त के भुगतान के बाद ये रकम बढ़के 14 हजार 665 करोड़ हो जाही। जानबा होवय के खरीफ 2019 म 18.43 लाख किसान मन के 4 किस्ता म इनपुट सब्सिडी के रूप म 5627 करोड़ रूपिया, खरीफ साल 2020 के 20.59 लाख किसान मन ला 5553 करोड़ रूपिया के इनपुट सब्सिडी दे जा चुके हावय। ए योजना के तहत किसान मन के इनपुट सब्सिडी के ये रकम राज्य म फसल उत्पादकता अउ फसल विविधीकरण ल बढ़ावा दे अउ काश्त लागत ल कम करे के उद्देश्य ले दे जात हावय।
मुख्यमंत्री भूपेश बघेल 20 अगस्त के ही गोधन न्याय योजना के तहत पशुपालक गांव वाला, गउठान समिति मन अउ महिला स्व-सहायता समूह के 5 करोड़ 24 लाख रूपिया के रकम जारी करही। गोधन न्याय योजना के तहत बीते दू साल म गोबर बेचइया मन, गउठान समिति मन अउ महिला समूह के 330 करोड़ रूपिया के भुगतान करे जा चुके हावय। 20 अगस्त के ए योजना के 50वीं किस्त के रकम 5.24 करोड़ रूपिया के भुगतान के बाद ये आंकड़ा बढ़के 335 करोड़ 24 लाख रूपिया हो जाही। गोधन न्याय योजना के तहत गउठान म दू रूपिया किलो म गोबर के खरीदी के सुरू 20 जुलाई 2020 ले हरेली परब ले के जा रेहे हावय। गउठान म 15 अगस्त 2022 तक 79.12 लाख क्विंटल गोबर के खरीदी के गे हावय। राज्य म 8408 गउठान बने अउ संचालित हावयं, जिहां 2 लाख 52 हजार ले जादा पशुपालक ग्रामीण गोबर बेच करके सोज लाभान्वित होत हावयं, एमे 1 लाख 43 हजार ले जादा भूमिहीन सामिल हावयं।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।