राज्य म पेसा कानून लागू होए ले बाढ़हिस ग्राम सभा के अधिकार : मुख्यमंत्री श्री भूपेश बघेल

अंजोर.रायपुर। विश्व आदिवासी दिवस के मउका म सर्व आदिवासी समाज के कार्यक्रम म मुख्यमंत्री भूपेश बघेल ह किहिन के पेसा कानून पहिली ले अस्तित्व म रिहिस फेर  येकर नियम नइ बने के सेती येकर लाभ आदिवासी मन के नइ मिल पात रिहिस। मुख्यमंत्री ह किहिन हावय के छत्तीसगढ़ म पेसा अधिनियम ल लेके नियम बन चुके हावय अउ येकर खातिर आठ अगस्त के राजपत्र म प्रकाशन तको करे जा चुके हावय। येकर ले आदिवासी अपन जल-जंगल-जमीन के बारे म खुद फइसला ले सकही।

मुख्यमंत्री विज्ञान कॉलेज परिसर के दीन दयाल उपाध्याय ऑडिटोरियम म विश्व आदिवासी दिवस के मउका म आयोजित सबो आदिवासी समाज छत्तीसगढ़ के कार्यक्रम म संबोधित करत रिहिस। ए कार्यक्रम म राज्य भर के जनजाति समुदाय के लोगन उपस्थित रिहिन। कार्यक्रम सुरू शहीद वीर नारायण के चित्र म माल्यार्पण अउ दीप प्रज्ज्वलन के संग होइस।

ये मउका म मुख्यमंत्री किहिन के आदिवासी मन के हित के संरक्षण दे के खातिर राज्य म पेसा कानून लागू होए ले गांव सभा के अधिकार बाढ़हे हावय। नवा नियम ले ग्राम सभा के 50 परतिसत सदस्य आदिवासी समुदाय ले होही।  ए 50 परतिसत म ले 25 परतिसत महिला सदस्य होही।

विश्व आदिवासी दिवस कार्यक्रम के संबोधित करत मुख्यमंत्री बघेल ह किहिन के उंकर सरकार बने के बाद विश्व आदिवासी दिवस म सार्वजनिक छुट्टी के घोसना करे गिस, आदिवासी मन के वन अधिकार के पट्टा दीस जेकर तहत अभी तक पांच लाख पट्टा वन अधिकार के तहत दे जा चुके हावयं। आदिवासी मन के हित ल धियान रखे के खातिर अउ योजना मन के समय म क्रियांवयन करे के खातिर जन जागरण अभियान कैलेंडर के विमोचन करे गे हावय।

सशक्तिकरण होवत हाबे, इही सेती हावय के बस्तर अउ सरगुजा के आदिवासी अपन गांव के खातिर बैंक खोले के मांग करे रिहिन मुख्यमंत्री ह किहिन के राज्य सरकार 65 रकम ले के लघु वनोपज खरीदत हावय अउ येकर ले आदिवासी मन के आर्थिक सशक्तिकरण होवत हाबे, इही सेती बस्तर अउ सरगुजा के आदिवासी अपन गांव के खातिर बैंक खोले के मांग करत हावयं। मुख्यमंत्री ह किहिन के आदिवासी मन के स्वास्थ्य के खातिर राज्य सरकार  सरलग काम करत हावय अउ इही के नतीजा हावय के मलेरिया के मामला म 65% कमी आये हावय। येकर संग ही मुख्यमंत्री हाट बाजार क्लीनिक ले तको लाखों लोगन लाभांवित होत हावयं।

मुख्यमंत्री ह कार्यक्रम म किहिन के शिक्षा के मामला म तको हम आगू बढ़त हावयं, हमन बस्तर के 300 बंद स्कूल के सुरू करे के काम करेन अउ शिक्षा के गुणवत्ता ल बढ़ाये के खातिर राज्य म 10  हजार नवा शिक्षक मनके भरती तको होत हावय। मुख्यमंत्री ह किहिन के  आदिम संस्कृति  छत्तीसगढ़ के पहचान हावय अउ आदिवासी मन के आजादी के लड़ाई म बड़का योगदान रिहिन हावय। मुख्यमंत्री ह किहिन के हम आदिवासी मन के सारी योगदान ल सहेज के रखना चाहत हावयं अउ येकर खातिर भाषा, संस्कृति सबो कुछ सहेजे के काम करे जात हावय। ए मउका म मुख्यमंत्री ह सबो के विश्व आदिवासी दिवस के सुभकामना दीस हावयं।

ए मउका म शिक्षा अउ आदिम जाति विकास मंत्री प्रेमसाय सिंह टेकाम, अनुसूचित जन जाति आयोग के अध्यक्ष भानु प्रताप सिंह, अनुसूचित जन जाति आयोग के उपाध्यक्ष सुश्री राजकुमारी दीवान, विधायक अउ संसदीय सचिव शिशुपाल सोरी,  विधायक सत्यनारायण शर्मा, विधायक बृजमोहन अग्रवाल, सबो आदिवासी समाज के अध्यक्ष भारत सिंह समेत हजारों के संख्या म आदिवासी समाज के लोगन उपस्थित रिहिस।