छत्तीसगढ़ी के बड़का साहित्यकार सुशील भोले ल मिलिस छत्तीसगढ़ गौरव सम्मान anjor.online

अंजोर.रायपुर। आठे कन्हैया तिहार के मउका म श्रीकृष्ण जन्मोत्सव समिति टिकरापारा डहर ले रायपुर के ऐतिहासिक रावण भाठा मैदान म आयोजित जबर जलसा म प्रदेश के वरिष्ठ साहित्यकार, संस्कृति मर्मज्ञ सुशील भोले ल 'छत्तीसगढ़ गौरव सम्मान' ले सम्मानित करे गिस। श्रीकृष्ण जन्मोत्सव अउ सम्मा न समारोह म रायपुर के महापौर एजाज़ ढेबर, सचिदानंद उपासने, कन्हैया अग्रवाल, माधव यादव, मनमोहन सिंह ठाकुर, सीमा शर्मा संग अउ आन सुजनी सियान मन जुरियाए रिहिन।

जानबा होवय के सुशील भोले प्रदेश के मूल संस्कृति ऊपर शोधपरख साहित्य के सिजन म पाछू केऊ बछर ले लगे हावय। मयारू माटी नाव के ओमन अस्सी के दशक म आरूग छत्तीसगढ़ी पत्रिका तको निकालत रिहिस। अभी घलोक ओमन सरलग छत्तीसगढ़, छत्तीसगढ़ी अउ छत्तीसगढि़या मन खातिर कलम चलाते हावय। भोले जी ल छत्तीसगढ़ गौरव सम्मान ले सम्मानित होए म छत्तीसगढ़ी साहित्यकार चंद्रशेखर चकोर, गीतकार गोविंद धनगर, पत्रकार जयंत साहू संग अंजोर छत्तीसगढ़ी मासिक पत्रिका अउ छत्तीसगढ़ी बेव न्यूस पोर्टल कोति ले गाड़ा-गाड़ा बधाई पठोय हाबे।