मुख्यमंत्री भूपेश बघेल ह साहित्यकार अउ पत्रकार लीलाधर मंडलोई ल वसुंधरा सम्मान ले करिन सम्मानित

अंजोर.रायपुर। मुख्यमंत्री भूपेश बघेल ह इतवार के अपन निवास कार्यालय म आयोजित सम्मान समारोह कार्यक्रम म सुप्रसिद्ध साहित्यकार अउ पत्रकार लीलाधर मंडलोई के वसुंधरा सम्मान ले सम्मानित करिन। ए मउका म मुख्यमंत्री ह किहिन के हरेक साल साहित्य अउ पत्रकारिता के क्षेत्र म उल्लेखनीय बुता करइया ए सम्मान ले सम्मानित करे जाथे। मंडलोई जी ह साहित्य अउ पत्रकारिता के क्षेत्र म उल्लेखनीय बुता करिन हावय। जब मैं पढ़ाई करत रेहेवं तब मंडलोई जी ल रेडियो म बहुत सुनन। रायपुर आकाशवाणी ले प्रसारित उंकर कार्यक्रम हम सबो सुनते रेहेन।

जानबा होवय के वसुंधरा सम्मान स्वर्गीय देवी प्रसाद चौबे के सुरता म दे जाथे। मुख्यमंत्री ह स्वर्गीय देवी प्रसाद चौबे ल सुरता करत किहिन के वो ग्रामीण पत्रकारिता के पुरोधा रिहिस। ओमन समाज सुधार के क्षेत्र म बहुत बुता करिन। वो बलि प्रथा के घोर विरोधी रिहिस। ओमन अपन गांव के मंदिर म तको बलि प्रथा बंद करा दीस रिहिस। मुख्यमंत्री ह किहिन के विचार म दृढ़ता होना चाही। विचार के असहमति ए देश के परंपरा रेहे हावय। असहमति ल सम्मान के भावना ए देश के कण-कण म हावय। हमर देश वसुधैव कुटुम्बकम् के भावना मानने वाला हावय। हम सबो के संकीर्णता ले बचना चाही।

स्वर्गीय देवी प्रसाद चौबे के 46वीं पुण्यतिथि म आयोजित वसुंधरा सम्मान के ये सरलग 22वां आयोजन हावय। ए सम्मान के ले मंडलोई के प्रशस्ति पत्र, सुरता चिनहा अउ सम्मान निधि दे गिस। कार्यक्रम के आयोजन संस्कृति विभाग छत्तीसगढ़ शासन लोक जागरण के मासिक पत्रिका कृति वसुंधरा अउ चतुर्भुज मेमोरियल फाउंडेशन के डहर ले समिलहा रूप ले करे गिस। कार्यक्रम म कृषि मंत्री रविन्द्र चौबे, संस्कृति मंत्री अमरजीत भगत, पद्मश्री भारती बन्धु, पद्मश्री मदन चौहान, वरिष्ठ साहित्यकार विष्णु नागर अउ आन गणमान्य नागरिक उपस्थित रिहिन।