गौरेला-पेंड्रा-मरवाही। पेंड्रा विकासखंड म भेंट-मुलाकात के बखत सकोला गांव म मुख्यमंत्री भूपेश बघेल ह किसान बालाराम के घर भोजन करिस। ओमन कोईलार, चेंच अउ मुनगा भाजी के स्वाद लिस। बरसात के मौसम म अरहर के दाल, चाउंर अउ उड़द बड़े के संग भाजी के सेवन वाकई मन के प्रसन्न करइया रिहिस। घर के सदस्य अउ सकोला गांव के सरपंच श्रीमती हीरामती ह बताइन के घर के पाछु ही बाड़ी हावय जेमा मुनगा, चेंच भाजी, कोइलार भाजी, भिंडी, बरबट्टी उक सब्जी लगावे हावयं। हीरामती ह मुख्यमंत्री के अपन ही घर के बाड़ी के चेंच, कोईलार अउ मुनगा भाजी खिलाके मगन कर दीस।
सरपंच श्रीमती हीरामती ह बताइन के शासन के ‘नरवा, गरवा, घुरवा अउ बाड़ी‘ योजना ले किसान मन ल काफी लाभ मिले हावय। बाड़ी योजना ले प्रेरित होके गांव के हर किसान घर के पाछु खाली जमीन म सब्जी-बाड़ी लगे रिहिन हावयं। येकर ले घर के लोगन के न केवल पौष्टिक अउ ताजी सब्जी मिलत हावयं, बल्कि येकर बिक्री ले कमाई तको होत हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।