रायपुर। मुख्यमंत्री भूपेश बघेल ह भेंट-मुलाकात दौरे के तहत गौरेला-पेण्ड्रा-मरवाही जिला म आज दू नवाचार कार्यक्रम मोर आखर अउ स्पोर्ट्स फॉर डेव्हलपमेंट के शुरूआत करिस। मोर आखर कार्यक्रम गौरेला अउ पेण्ड्रा विकासखण्ड के 299 प्राथमिक स्कूल म क्रियान्वित करे जाही, जेन प्राथमिक स्कूल के लइका के प्रारंभिक भाषा शिक्षा म सुधार लाने, लइका ल पढ़े-लिखे के क्षमता ल जादा प्रभावी बनाये के पहल हावय।
दूसरा कार्यक्रम स्पोर्ट्स फॉर डेव्हलपमेंट के तहत खेल के माध्यम ले जिला के 543 प्राथमिक स्कूल के लइका के प्रायोगिक अउ व्यवहारिक पद्धति ले तइयार करे जाही, ताकि ओमा तेजी ले सीखे के कौशल के संग स्वास्थ्य, शारीरिक अउ मानसिक विकास अउ उंकर जीवन शैली म सुधार लाये जा सके। जानबा होवय के दुनिया के 50 देश म व्यवहारिक शिक्षा के ए पद्धति के सफल प्रयोग करे जा चुके हावय।
कोरोना काल म स्कूल के बंद होए के सेती लइका म सीखे के क्षमता म कमी आये हावय। एला देखत होए मोर आखर कार्यक्रम के सुरू करे गे हावय, जेन लइका म पढ़े के क्षमता अउ पढ़े के आदत म बड़वार करे म सहायक होही।
इही रकम ले स्पोर्ट्स ऑफ डेव्हलपमेंट गौरेला-पेण्ड्रा-मरवाही जिला के सबो स्कूल म सुरू करे गे हावय। येकर उद्देश्य शारीरिक अउ मानसिक विकास करे अउ खेल-खेल म लइका के सीख बढ़ाना हावय। ए कार्यक्रम के ले कक्षा उपयुक्त, उमर उपयुक्त अउ बालक-बालिका मनके खेल म समान मउका देना सामिल हावय। ये दुनों कार्यक्रम यूनिसेफ के सहयोग ले संचालित करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।