चंदखुरी के नाव ल महतारी कौशल्या धाम चंदखुरी करे खातिर मुख्यमंत्री भूपेश बघेल ल महंत रामसुंदर दास ज्ञापन सउपिस

अंजोर.रायपुर। मुख्यमंत्री भूपेश बघेल ले आज उंकर निवास कार्यालय म छत्तीसगढ़ राज्य गौ सेवा आयोग के अध्यक्ष राजेश्रीडॉ. महंत रामसुंदर दास ह सौजन्य मुलाकात करिस। डॉ. महंत ह मुख्यमंत्री बघेल के विश्व परसिध महतारी कौशल्या के नगरी गांव चंदखुरी ल महतारी कौशल्या धाम चंदखुरी करे के खातिर ज्ञापन सउपिस।

डॉ. महंत रामसुंदर दास ह मुख्यमंत्री बघेल ल छत्तीसगढ़ महतारी के यशकीर्ति के जन-जन तक पहुंचाये अउ अरपा-पैरी के धार गीत ल राजकीय गीत घोसित करे के खातिर उंकर आभार व्यक्त करिन। संग ही डॉ. महंत ह सबो सरकारी कार्यालय अउ सरकारी आयोजन म छत्तीसगढ़ महतारी के छायाचित्र के अनिवार्य रूप ले ठऊर  दे के खातिर मुख्यमंत्री बघेल के धन्यवाद दीस। ओमन मुख्यमंत्री भूपेश बघेल ले प्रदेस के सबो कलेक्ट्रेट परिसर म छत्तीसगढ़ महतारी के आदमकद प्रतिमा स्थापित करे के तको गेलौली करिन। ए मउका म निर्मल दास वैष्णव अउ आरपी सिंह उपस्थित रिहिस।