एसपी अभिषेक मीणा के निर्देशन म साइबर जागरूकता दिवस मुहिम, स्कूल म जाके पुलिस पढ़इया लइका ल करही जागरूक... अंजोर छत्तीसगढ़ी म पढ़व पूरा खबर

रायगढ़। एसपी रायगढ़ अभिषेक मीना के दिशा  निर्देशन म जिला म “साइबर जागरूकता दिवस” मुहिम आज ले सबो थाना, चौकी क्षेत्र ले सुरू करे गे हावय। अभियान के तहत थाना, चौकी प्रभारी के स्कूल म जाके पढ़इया लइका  ल साइबर अपराध के प्रति जागरूक करे जाये निर्देशित करे गे हावय।

इही कड़ी म सबो अनुविभाग म थाना, चौकी प्रभारी डहर ले स्कूल म जाके साइबर अपराध के प्रति जागरूक करे गिस। पुलिस अधिकारी लइका ल बताइस के साइबर अपराध जेन आज ज्वलंत समस्या हावय। मोबाइल, इंटरनेट, सोशल प्लेटफार्म के जरिये आए दिन नए-नए तरीका ले लोगन ल ठगे जात हावय। एला रोके के खातिर जागरूक होए के जरूरत हावय। सोशल प्लेटफार्म म सावधानी अउ सतर्कता जरूरी हावय अउ इही ए अपराध ल रोके के सबले बड़का हथियार। ओकर ले बांचे के खातिर पढ़ईया मन खुद जागरूक हो अउ अपन परिवारजन, संगी ल तको जागरूक करें।

पुलिस अधिकारी मन स्कूली पढ़ईया लइका के फेसबुक हैकिंग, बारकोड़ के माध्यम ले होए वाला फ्राड, वाट्सएप हैकिंग ले बचाव, फर्जी वेबसाइट ले होए वाला फ्राड के संबंध म सावधानी बरते के सलाह दिस। साइबर अपराध ले बचाव के क्रम म लइका के ठग के तरीका सिम कारड के माध्यम ले, एटीएम कारड बदलके, डेबिट कार्ड, क्रेडिट कारड के माध्यम ले, बायोमेट्रिक, क्यूआर कोड स्कैन, इंटरनेट मीडिया म अनजान मनखे ले दोस्ती, फर्जी काल, अनजान वाट्सएप वीडियो काल, आनलाइन लोन दे वाला एप, इंटरनेट मीडिया म रुपय के मांग करे वाला ले, गूगल ले कस्टमर केयर नंबर सर्च करे अउ यूपीआइ संबंधित फ्राड के प्रति तको पढ़इया लइका ल जागरूक करे गिस। संग ही लइका के हेल्प लाइन नम्बर 1091, डॉयल 112, अभिव्यक्ति ऐप के जानकारी दे गिस।