सौतेला पिता डहर ले बेटी मन के जमीन हड़पे के गलत नियत ल रोके खातिर राज्य महिला आयोग करही मुआयना

रायपुर. राज्य महिला आयोग के अध्यक्ष डॉ. किरणमयी नायक ह आयोग कार्यालय म महिला मन ले संबंधित शिकायत के निराकरण के खातिर सुनवाई करिस। आज एक प्रकरण के सुनवाई म आवेदिका तीन बहन हावय। उंकर पिता के मृत्यु के बाद उंकर महतारी ह लइका के चाचा के संग बिहाव करिन हावय। सौतेला पिता अब अपन बेटी मन के जमीन हड़पे के नियत ले ओला परेशान करत हावय। आवेदिका ह बताइन के उंकर साढ़े तीन एकड़ भूमि के गांव के लोगन ल रेगहा नइ ले बर डरा-धमका देथे, येकर ले आवेदिका के एक साल के आमदनी नइ होए ले उंकर जीवन यापन म असर पड़ही। एमा अनावेदक के कहना हावय के मैं खेत ल बोये के खातिर कोनो रोक टोेक नइ करे हावय। ए स्तर म आयोग के अध्यक्ष डाॅ नायक ह प्रशिक्षु वकील अउ आयोग के कांउसलर के संग काली गांव पंचायत जौन्दा म आवेदिका के संग जाके जगह के जायजा लेही।

ए बखत गांव पंचायत भवन म कोतवाल डहर ले मुनादी करके सबो ग्रामवासी के आहूत करे जाये के निर्देश दिये गे हावयं। आवेदिका ह ये तको बताइन के गांव के कोतवाल हमर जमीन के कागजात लाने के खातिर धमकात हावय। ग्रामवासी के तीर अनावेदक घोसना करही के उंकर डहर ले कोनो रेगहा ले वाला म कोनो रोक नइ लगाये गे हावय। ए सरी प्रक्रिया के रिपोर्ट काउंसलर के डहर ले तइयार करे जाही। जेमा ग्रामसभा म उपस्थित गवाह लोगन के दस्तखत ले जाही अउ विडियो प्रशिक्षु वकीलगण के डहर ले तइयार करे जाही। ए सरी आर्डर शीट के विडियो अउ रिपोर्ट तइयार करे जाही। जेकर ले ए प्रकरण के निराकरण करे जा सकही।