राहुल साहू स्वस्थ होके पहुंचिस घर, मुख्यमंत्री अउ रेस्क्यू टीम के जताइस आभार

राहुल साहू स्वस्थ होके पहुंचिस घर

बिलासपुर। राहुल के पिता रामकुमार ह मुख्यमंत्री अउ पूरा रेस्क्यू टीम के प्रति जताइस आभार। मुख्यमंत्री भूपेश बघेल ह जांजगीर-चांपा जिला के मालखरौदा विकासखण्ड के पिहरीद गांव म बोरवेल म सकुशल निकाले गे बालक राहुल साहू के इलाज के बाद बिलासपुर के अपोलो अस्पताल ले डिस्चार्ज होए म खुशी जाहिर करत किहिन के सबके दुआ अउ मेहनत ले राहुल स्वस्थ होके आज अस्पताल ले डिस्चार्ज हो गे हावय। मुख्यमंत्री ह किहिन के राहुल के 104 घंटा के सरलग मैराथन रेस्क्यू ऑपरेशन के बाद बोरवेल ले सुरक्षित निकाले गे, येकर बाद उंकर जेन मेडिकल समस्या रिहिस, उंकर डॉक्टर मन ह तत्परता ले अउ गंभीरता ले इलाज करिन अउ आज राहुल अस्पताल ले डिस्चार्ज हो गे हावय, येकर ले जादा संतोष के बात दूसर नइ हो सकते। श्री बघेल ह किहिन के राहुल के स्पीच थैरेपी कराये जाही, जेकर ले वो बोल सकें।

राहुल के पिता रामकुमार साहू ह अस्पताल ले स्वस्थ होके राहुल के डिस्चार्ज होए म मुख्यमंत्री भूपेश बघेल, जांजगीर-चांपा कलेक्टर सहित पूरा रेस्क्यू टीम के धन्यवाद दे हावय। ओमन किहिन के राहुल ल बचाये के खातिर जिला प्रशासन, एन.डी.आर.एफ., एस.डी.आर.एफ., सेना सहित आन सबो टीम ह बहुत मेहनत करिस। मुख्यमंत्री भूपेश बघेल जी तको सरलग उंकर ले बात करके राहुल के सकुशल निकाले अउ हरसंभव मदद के बात कहत रिहिन हावयं। अपोलो अस्पताल ले राहुल के डिस्चार्ज होए के बखत जांजगीर-चांपा के कलेक्टर जितेन्द्र कुमार शुक्ला अउ पुलिस अधीक्षक विजय अग्रवाल तको उपस्थित रिहिस।