कुम्हाररास म ग्लेजिंग यूनिट के लोकार्पण करिस मुख्यमंत्री भूपेश बघेल

अंजोर,24 मई। ग्लेजिंग यूनिट के माध्यम ले आर्थिक आय बढ़ाये अउ अपन हुनर ल निखारके बाजार तक पहुंचाये के दिशा म दंतेवाड़ा जिला के कुम्हार मनला बड़का मदद मिलही। ये बात कुम्हाररास म ग्लेजिंग यूनिट के लोकार्पण के मउका म मुख्यमंत्री भूपेश बघेल ह कहीन। ओमन पूरा परिसर के अवलोकन करिन। इहां ग्लेजिंग यूनिट के खातिर स्थापित करे गे मसीन ल देखे अउ इहां कुम्हार मन डहर ले उत्पादित करे गे जिनिस के डिस्प्ले तको देखिस। कुम्हार मनह ओला अपन हाथ ले बने गजराज के प्रतिमा तको भेंट करिस।

गोठबात म मुख्यमंत्री ह किहिन के हमर लोककला म बड़का संभावना हावयं अउ इंकर पूरा दोहन के खातिर माटीकला बोर्ड के माध्यम ले ग्लेजिंग यूनिट ल प्रोत्साहित करे के बुता सरकार डहर ले करे जात हावय। ग्लेजिंग यूनिट म लगे आधुनिक मसीन के मदद ले कुम्हार कम समय म माटी के सुंदर सामान तइयार कर पाही। एक ठऊर  म अइसे डिस्प्ले यूनिट होए ले ओला बाजार तक पहुंचे म तको बड़का मदद मिलही।

छत्तीसगढ़ माटीकला बोर्ड के अध्यक्ष बालम चक्रधारी ह ओला विस्तार ले कुम्हाररास ग्लेजिंग यूनिट के जानकारी दीस। ओमन बताइन के इहां बाल मिल, ब्लेंजर, एजिटेटर, फिल्टर प्रेस उक मशीन रखे गे हावयं जेकर माध्यम ले माटीकला के बुता सहज हो जात हावय। मुख्यमंत्री ह किहिन के प्रशिक्षण के बहुत महत्ता हावय येकर ले कला के निखारे म मदद मिलती हावय अउ येकर ले व्यावसायिक संभावना काफी बढ़ जात हावयं। दंतेवाड़ा म ग्लेजिंग यूनिट सुरू हो जाये ले अब माटीकला ल बड़का विस्तार मिल पाही।