अवैध उत्खनन रोके खातिर कलेक्टर, एसपी ल मुख्यमंत्री के कड़ा निर्देश, कार्रवाई नइ होए म अधिकारी मन के विरूद्ध होही कार्रवाई

अंजोर.रायपुर 28 जनवरी। मुख्यमंत्री भूपेश बघेल ह अवैध रेत उत्खनन करइया के विरुद्ध सख्त कार्रवाई करे के निर्देश दे हावयं। मुख्यमंत्री ह कलेक्टर अउ एसपी ल निर्देश दे हावयं के कोनो भी जिला म अवैध रेत उत्खनन नइ होना चाही। कोनो भी जिला ले अवैध रेत उत्खनन के शिकायत मिले म कलेक्टर अउ एसपी व्यक्तिगत रूप ले जिम्मेदार होही।  

अवैध उत्खनन म कार्रवाई नइ होए म जिला के अधिकारी मन के जिम्मेदारी तय करे जाही अउ उंकर विरुद्ध कड़ा अनुशासनात्मक कार्रवाई होही। मुख्यमंत्री ह अवैध उत्खनन रोके बर कलेक्टर अउ एसपी ल स्वयं मॉनिटरिंग करे के निर्देश दे हावयं ।

मुख्यमंत्री श्री बघेल ह प्रदेस म रेतमाफिया डहर ले अवैध रूप ले रेत के उत्खनन अउ परिवहन के खबर ल गंभीरता ले हावय। ओमन ए सबंध म खनिज विभाग के आला अफसर के रेत माफिया म सख्ती ले लगाम लगाये के निर्देश दे हावयं। 

ओमन किहिन हावय के कलेक्टर अउ एसपी अपन जिला म रेत के अवैध उत्खनन अउ परिवहन के गतिविधी म कड़ी निगरानी रखें अउ सख्ती ले कार्रवाई करके रोक लगावे। राज्य के अवैध रूप ले रेत उत्खनन अउ परिवहन ले राजस्व म नुकसान उठाना पड़त हावय। मुख्यमंत्री ह किहिन के जिहां रेत के अवैध उत्खनन अउ परिवहन के शिकायत मिलत हावयं, उहां खनिज विभाग के अधिकारी मन अउ मैदानी अमला ले सतत रूप ले सरलग रूप ले निरीक्षण कराइन जाए। ओमन किहिन के ये बुता म संलिप्त लोगन के विरूद्ध प्रकरण तइयार करे  जाए। परिवहन के खातिर प्रयुक्त गाड़ी ल जप्त करे के कार्रवाई तको करे जाए।