सहदेव दिरदो बनही जुनियर जोगी, ‘द अजीत जोगी’ के निर्देशक देवेन्द्र जांगड़े करिस खुलासा

सिनेमा। छत्तीसगढ़ी सिनेमा के इतिहास म सबसे दमदार फिलिम अब अवइया हावय जेकर नाम हे ‘द अजीत जोगी’। ये फिलिम बने के पहिली गजब चर्चा म हाबे। छत्तीसगढ़ राज के पहिली मुख्यमंत्री अजीत जोगी जी के बायोपिक छॉलीवुड म रार मचाये के संग उंकर जीवन के केऊ भितरी बात ल उजागर करही। मिले आरो के मुताबिक ये फिलिम म अजीत जोगी के नानपन के किरदार ल बस्तर अंचल के नवोदित कलाकार ‘बचपन का प्यार’ फेम सहदेव दिरदो निभाही। फिलिम के निर्माता, निर्देशक मन सहदेव ले मिलके ये बात ल सोशल मीडिया म साफर करे हावय। 

जानबा होही के सहदेव पाछु दिन एक हादसा म घायल होगे रिहिस। द अजीत जोगी म जोगी जी के बचपन के किरदार बर गोठबात के संग अस्पताल म फिलिम के प्रोड्यूसर मनके टीम सहदेव भेट करिन। देस के राजनीति म अजीत जोगी एक बड़का नाम रिहिस। छोटकुन गांव ले निकल के अजीत प्रमोद कुमार जोगी के प्रोफेसर, आईपीएस, आईएएस अउ सांसद ले नवोदित राज्य छत्तीसगढ़ के मुख्यमंत्री बने तक के सफर कोनो फिलिम के कहानी सहित लगथे। अऊ जेन जोगी जी के जीवन ल जानथे वोमन वो ह अजीत जोगी ल अपना आर्दश मनाथे। जोगी जी रिहिस तभो अऊ अब भी हर क्षेत्र म उंकर करोड़ों प्रशंसक हावय। 

हालाकि ये छॉलीवुड के दूसरा बायोपिक मूवी आए, येकर पहिली मंदराजी तको आए रिहिस। जेमा नाचा के पुरोधा दाऊ मंदराजी के जीवन ल रेखांकित करे गे रिहिस। अब मेगा बजट म ‘द अजीत जोगी’ के निर्माण करे जावत हाबे। निश्चित रूप ये फिलिम बनाना एक बड़े कारज साबित होही, जोगी जी प्रेरक अउ संघर्षपूर्ण जीवन दर्शन के दर्शक मनला बड़ अगोरा हावय।  

• फिल्म :-  द अजीत जोगी
• निर्माता :- अरविंद कुर्रे 
• निर्देशक :- देवेन्द्र जांगड़े
• संगीतकार :- हेमलाल चतुर्वेदी
• कलाकार :- राज साहू, देवेन्द्र जांगडे, शिखा चितांबरे, सहदेव दिरदो