जबर बुता करइया पुलिस अधिकारी मन अउ बहादुर लइका के सम्मान करिस राज्यपाल सुश्री अनुसुईया उइके

अंजोर.रायपुर, 26 जनवरी। गणतंत्र दिवस समारोह रायपुर म उत्साह के संग मनाये गिस। ये मउका म राज्यपाल सुश्री अनुसुईया उइके ह पुलिस परेड ग्राउंड म 73वें गणतंत्र दिवस के मउका म आयोजित मुख्य समारोह म ध्वजारोहण करिन अउ परेड के सलामी लिस। राज्यपाल ह उत्कृष्ट बुता करइया पुलिस अधिकारी मन अउ कर्मचारी मन ल पदक अलंकरण ले सम्मानित करिन। येकर अलावा राज्यपाल ह राज्य वीरता पुरस्कार ले कोरबा के मास्टर अमन ज्योति जाहिरे अउ धमतरी जिला के मास्टर शौर्य प्रताप चन्द्राकर धमतरी ल सम्मानित करिन। राज्यपाल ह 21 पुलिस अधिकारी मन ल पुलिस वीरता पदक ले सम्मानित करिन। 

राज्यपाल सु उइके ह खास सेवा बर राष्ट्रपति के पुलिस पदक ले उदयभान सिंह चौहान अकताहा पुलिस अधीक्षक, सीआईडी पुलिस मुख्यालय रायपुर के सम्मानित करिन। येकर संग ही राज्यपाल ह 10 पुलिस अधिकारी मन अउ कर्मचारी मनके सराहनीय सेवा बर भारतीय पुलिस पदक ले सम्मानित करिन। 

राज्यपाल सु उइके ह 6 पुलिस अधिकारी अउ कर्मचारी मन ल गृह रक्षक अउ नागरिक सुरक्षा पदक ले सम्मानित करिन संग म 7 पुलिस अधिकारी अउ कर्मचारी मन ल यूनियन होम मिनिस्टर मेडल ले सम्मानित करिन। येकर अलावा राज्यपाल ह दू जेल प्रहरी के सराहनीय सुधार सेवा पदक ले सम्मानित करिन।