उर्वशी साहू बनही ‘जोगी’ के महतारी, द अजीत जोगी बायोपिक के लघियात सुरू होही सूटिंग

सिनेमा.ए। छत्तीसगढ़ के पहिली मुख्यमंत्री माननीय अजीत जोगी के ऊपर बनइया मेगा बजट छत्तीसगढ़ी बायोपिक मूवी ‘द अजीत जोगी’ के अहम किरदार मनके खुलासा अब धीरे-धीरे होवत हावय। पाछू दिन मुंबई ले गाना डब कराके रायपुर लहुंटे निर्माता, निर्देशक के टीम अब बिगर देरी करे लघियात सूटिंग सुरू करे के मन बना डरे हावय। इही सेती ओमन जोगी जी के नानपन के किरदार खातिर ‘बचपन का प्यार’ फेम बस्तर के नवोदित वायरल बॉय सहदेव दिरदो ले मुलाकात करके अनुबंध करिन हावय। मिले आरो के मुताबिक अब जोगी के महतारी के भूमिका खातिर छॉलीवुड के जबरदस्त कलाकार उर्वशी साहू के चयन करे गे हावय।   

सोशल मीडिया म पोस्टर साझा करे के बाद ये बात ल खुसी-खुसी किहिन के जोगी के महतारी बनना बड़ गरब के बात आए। अऊ फिलिम के निर्देशक देवेन्द जांगड़े जी ल बहुत-बहुत धन्यवाद जेन मोला जोगी जी के मां के किरदार दे हावय, ये मोर बड़ सौभाग्य के बात आए। ओमन किथे के मां के किरदार ल करे नइ जाये, बल्कि महतारी-बेटा के रिस्ता ल बस महसूस करना ही अभिनय आए अउ मैं ये रोल ल दिल से जीये के पूरा कोसिस करहूं। कोसिस करहूं के निर्देशक के उम्मीकद म खरा उरतके ही दर्शक मनके मया दुलार पा सकहूं। 

वइसे सूटिंग के कोनो आधिकारिक घोसना के आरो नइ मिले हावय फेर सोशल मीडिया कोति ले केहे जाथे के सूटिंग 25 जनवरी ले बाबा गुरू घासीदास जी के पावन तपोभूमि गिरोधपुरी ले सुरू होही। 

• फिल्म :-  द अजीत जोगी
• निर्माता :- अरविंद कुर्रे 
• निर्देशक :- देवेन्द्र जांगड़े
• संगीतकार :- हेमलाल चतुर्वेदी
• कलाकार :- राज साहू, देवेन्द्र जांगडे, शिखा चितांबरे, सहदेव दिरदो, उर्वशी साहू

अजीत जोगी जी के बायोपिक के बारे म अऊ पढ़व इहां- 

सहदेव दिरदो बनही जुनियर जोगी, ‘द अजीत जोगी’ के निर्देशक देवेन्द्र जांगड़े करिस खुलासा