अंजोर.ए.। भारत के टेनिस स्टार सानिया मिर्जा के टेनिस ले सन्यास ले के आरो मिलत हावय। सानिया कोति ले अभी तक वइसे तो ये खबर ल सोशल मीडिया म उंकर कोति ले साझा नइ करे गे हावय। फेर जेन बड़का अखबार मन लिखत हावय, ओमा तको सचाई होही। द इंडियन एक्सप्रेस लिखथे के टेनिस खिलाड़ी सानिया मिर्जा ह करिस संन्यास के घोसना उंकर 2022 डब्ल्यूटीए दौरा आखरी होही। केहे जाथे के सानिया ह महिला युगल म पहिली दौर म हार के बाद ये घोसना करे हावय।
मिले आरो के मुताबिक सानिया अउ उंकर जोड़ीदार यूक्रेन के नादिया किचेनोक ल स्लोवेनियाई टीम तमारा जिदानसेक अउ काजा जुवान ले एक घंटा 37 मिनट म 4-6, 6-7 (5) ले हार के सामना करे बर परिस।
भारत कोति ले सरलग कई बच्छर ले शानदार खेल के प्रदर्शन कई पुरस्कार के बाद सानिया ये घोसना ले टेनिस खिलाड़ी मन दुखी होवत हावय। 35 बच्छर के सानिया मिर्जा युगल म विश्व के पूर्व नंबर 1 खिलाड़ी आए अउ एकल म उंकर करियर के सर्वश्रेष्ठ रैंकिंग 27 हावय। ये बखत सानिया ह विश्व म 68वां नंबर म हावय।
सानिया मिर्जा के खेल के संग खूबसूरती के तको दुनिया दिवाना हावय। खेल के संगे-संग ओमन के चर्चा सिनेमा उक म तको होवय। बिहाव के पहिली तक कभू मजहब और देश के नाम त, कभू अपन पकड़ा ल लेके चर्चा म रेहे हावय। सानिया के ये फइसला ले केऊ खिलाड़ी मनला दुख होवत हावय, खैर ये उंकर निजी मन के बात आए, सन्यास के बात लबारी तको हो सकत हावय। अउ सच होही तव सानिया जी ल उंकर नवा जीवन बर अघात मया आसीस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।