जूनियर वकील मनके ट्रेनिंग खातिर बनही कार्ययोजना, दुर्ग म बार एसोसिएशन होही रिनोवेट अउ लाइब्रेरी तको अपग्रेडेड होही : दाऊ भूपेश बघेल

अंजोर.रायपुर, 20 जनवरी। मुख्यमंत्री दाऊ भूपेश बघेल ह किहिन के जूनियर वकील मन ल न्यायालयीन काम-काज के ट्रेनिंग दे खातिर कार्ययोजना तइयार करे जाही। ट्रेनिंग ले जूनियर वकील मन ल फील्ड म काम करे म जिहां जादा सुविधा होही, उहें न्याय के मांगइया  नागरिक ल तको येकर लाभ मिलही। मुख्यमंत्री भूपेश बघेल ह अपन निवास कार्यालय ले जिला वकील संघ दुर्ग के शपथ ग्रहण कार्यक्रम के सम्बोधित करत ये घोसना करिस। ये मउका म दुर्ग बार एसोसिएशन के कक्ष म आदर्श बइठक बेवस्था अउ लाइब्रेरी के आधुनिकीकरण के खातिर मंजूरी तको दीस।

मुख्यमंत्री ह किहिन के कानून के पढ़ाई करे के बाद जब जूनियर वकील न्यायालय आथे त न्यायालय के कार्रवाई के पद्धति उक के ज्ञान कम होए के सेती ओला काफी परसानी होथे, येकर निराकरण के खातिर विधि विभाग डहर ले प्रशिक्षण के कार्ययोजना बनाये जाही। ओमन किहिन के वकील के कार्यक्षेत्र व्यापक हावय। ओला तहसीलदार, एसडीएम, कलेक्टर उक के न्यायालय म तको जाना होथे। निर्वाचन के बखत भी उम्मीदवार उंकर संपर्क म आथे अउ केऊ रकम ले के डाक्यूमेंट लगथे जेकर खातिर प्रत्याशी वकील के पास जाथे। यदि वकील प्रशिक्षित होही, त वो जादा बढि़या तरीका ले अपन बुता कर पाही।