धमतरी म कक्षा पहिली ले आठवीं तक के स्कूल रइही बंद, जिला शिक्षा अधिकारी ह जारी करिन आदेश

अंजोर.धमतरी 18 जनवरी। जिला म कोविड-19 के बाढ़त संक्रमण के देखत कलेक्टर श्री पी.एस. एल्मा के निर्देश के मुताबिक जिला म स्थित कक्षा पहिली ले आठवीं तक के कक्षा ल बंद करे के आदेश जिला शिक्षा अधिकारी श्रीमती रजनी नेल्सन ह दे हावय। संग ही कक्षा नवमीं ले 12वीं तक के कक्षा के संचालन पढ़ईया मन के एक-तिहाई उपस्थिति म करे के निर्देश दे गे हावयं।

जिला म स्थित शासकीय, अर्धशासकीय अउ अशासकीय स्कूल के संस्था प्रमुख ल जारी करे  गे आदेश म जिला शिक्षा अधिकारी ह किहिन हावय के कोविड-19 के तेजी ले बढ़त संक्रमण के रोकथाम करे के सेती ले कक्षा पहिली ले आठवीं तक संचालित सबो प्राथमिक अउ पहिली माध्यमिक विद्यालय ल अवइया आदेश तक बंद रखे जाए। संग ही कक्षा नवमीं ले 12वीं (हाई अउ हायर सेकण्डरी स्कूल) तक के शाला के एक-तिहाई लइका के उपस्थित म संचालन करे जाए। 

येकर अलावा शाला म पढ़त 15 ले 18 साल के पढ़ईया मन के शत-प्रतिशत कोविड टीकाकरण के बुता अवइया दू दिन के भीतर पूरा करे के तको निर्देश दे गे हावयं। लंबित टीकाकरण के सरी जिम्मेदारी संस्था प्रमुख के होही। संग ही चिट्ठी म ये तको उल्लेख करिन हावय के सबो शिक्षकीय/कार्यालयीन स्टाफ के खातिर कोविड के द्वितीय डोज टीकाकरण अनिवार्य हावय।