शहीद वीर नारायण सिंह के बलिदान दिवस म शत शत नमन : पुरखा के सुरता

अंजोर.रायपुर। छत्तीसगढ़ के पहिली स्वतंत्रता संग्राम सेनानी अमर शहीद वीरनारायण सिंह ल उंकर बलिदान दिवस 10 दिसम्बर के मउका म शत शत नमन। वीर नारायण सिंह के जनम 1795 म सोनाखान के धरती म होए रिहिस । वीर नारायण सिंह ह दीन-दुखिया अउ गरीब मन के खातिर जेन बुता करे हावय तेला कभू बिसारे नइ जा सके, वीर नारायण सिंह छत्तीसगढ़ महतारी के सच्चा सपूत रिहिस। सन् 1856 के भयानक अकाल के बखत गरीब मन ल भूख ले बचाये के खातिर आदिवासी जन-नायक वीर नारायण सिंह ह अंग्रेजी हुकूमत के खिलाफ कठिन संघर्ष करिन। सन् 1857 के पहिली स्वतंत्रता संग्राम आंदोलन म ओमन छत्तीसगढ़ के जनता म देश भक्ति के संचार करिन। अन्याय के खिलाफ सतत् संघर्ष, मातृभूमि के प्रति समर्पण अउ बलिदान के जब जब सुरता करे जाही तब तब पहिली नाव शहीद वीर नारायण सिंह के आही।

एसो बलिदान दिवस के मउका म केऊ बड़का आयोजन करे जात हावय जेमा छत्तीसगढ़ किसान मोर्चा कोति ले रायपुर के जय स्तंभ चौक म वीर नारायण सिंह जी के प्रतिमा लगाये के मांग के संग पुरखा ल श्रद्धांजलि अर्पित करे जाही। ऐकरे संग ही प्रदेश के छत्तीसगढि़या मुख्यमंत्री दाऊ भूपेश बघेल तको उनला सुरता करत उंकर सोर गावत नमन करे हावय।