अंजोर.रायपुर, 30 नवम्बर। मुख्यमंत्री दाऊ भूपेश बघेल के घोसना के मुताबिक प्रदेश म एक दिसम्बर ले समर्थन कीमत म धान के खरीदी शुरू होही। समर्थन कीमत म धान खरीदी के खातिर सबो जरूरी तइयारी पूरा हो चुके हावयं। ए खरीफ साल म लगभग 22.66 लाख पंजीकृत किसान मन ले 2399 सहकारी समिति मन के माध्यम ले धान उपार्जन करे जाही। राज्य सरकार डहर ले पंजीकृत किसान मन ले लगभग 105 लाख मीटरिक टन धान खरीदी के अनुमान हावय। ए साल किसान मन-ग्रामीण मनके सुविधा ल धियान म रखत राज्य शासन डहर ले 88 नवा धान उपार्जन केन्द्र सुरू करे के अनुमति दे गे हावय।
खाद्य विभाग के अधिकारी मन ह बताइन के राज्य शासन डहर ले खरीफ विपणन साल 2021-22 के तहत समर्थन कीमत म किसान मन ले धान के नकद अउ लिंकिंग के माध्यम ले खरीदी एक दिसम्बर 2021 ले 31 जनवरी 2022 तक अउ मक्का के खरीदी एक दिसम्बर 2021 ले 28 फरवरी 2022 तक करे जाही। खरीफ विपणन साल 2021-22 के खातिर औसत अच्छा किस्म के धान के खातिर समर्थन कीमत के दर, धान कॉमन 1940 रूपिया प्रति क्विंटल, धान ग्रेड ए 1960 रूपिया प्रति क्विंटल अउ औसत अच्छा किस्म के मक्का के समर्थन कीमत 1870 रूपिया प्रति क्विंटल के दर करार हावय।
खाद्य विभाग के अधिकारी मन ह बताइन हावय के धान खरीदी बेवस्था के सुचारू अउ पारदर्शी रूप ले संचालन के खातिर नोडल अधिकारी नियुक्त करे गे हावयं। ये नोडल अधिकारी मन डहर ले रोज धान खरीदी अउ आन बेवस्था अउ समस्या ले संबंधित स्थिति के मॉनिटरिंग करही। यदि ये नोडल अधिकारी मन के प्रभार वाला खरीदी केन्द्र म गड़बड़ी पाई जात हावय त येकर खातिर नोडल अधिकारी जवाबदेह होही। येकर अलावा राज्य के किसान मन के ही जिनिस खरीदी केन्द्र म आए एला धियान म रखत होए राज्य सीमा के संवेदनशील क्षेत्र म चेक-पोस्ट लगाके पुलिस, राजस्व अउ खाद्य विभाग के संयुक्त टीम डहर ले कड़ा निगरानी करे जात। उहें अवैध धान परिवहन करत पाए जाये म टीम डहर ले धान जप्त करके सख्त कार्यवाही भी करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।