छत्तीसगढ़ी भाखा म प्राथमिक शिक्षा खातिर स्कूल-स्कूल, गाँव-गाँव चलही अभियान

रायपुर। छत्तीसगढ़ी राजभाषा दिवस के मउका म प्रदेश भर ले छत्तीसगढ़ी के खातिर बुता करइया मन रायपुर के प्रेस क्लब म जुरियाइन। ये मउका म आयोजित गोष्ठी म सबो झिन सुनता ले तय करिन के प्राथमिक शिक्षा छत्तीसगढ़ी म हो येकर खातिर स्कूल-स्कूल, गाँ-गाँव जन-जागरण चलाये जाही। संग ही सरकार ले अपील भी करिन के के छत्तीसगढ़ी माध्यम म शिक्षा दे के जेन ऐलान सरकार ह करे रिहिस ओला पूरा करे।

प्रेस क्लब म आयोजिक गोष्ठी म छत्तीसगढ़ी राजभाषा मंच के संरक्षक नंदकिशोर शुक्ल ह बताइन के कइसे राज्य निर्माण ले लेके अब तक 21 साल म छत्तीसगढ़ी के संग छल होइस हावय। राज्य के नौकरशाह ह सरकार ल गुमराह करे के काम करत हावय। छत्तीसगढ़ी ल छत्तीसगढ़ी भाषी प्रांत म सामिल नइ करे के सेती आज भी हमन ल संघर्ष करे पड़त हावय। सरकार ल तुरते प्राथमिक शिक्षा छत्तीसगढ़ी म देनी चाही।

मिले आरो के मुताबिक छत्तीसगढ़िया महिला क्रांति सेना के अध्यक्ष लता राठौर ह किहिन के सरकार ह घोसना म अमल नइ करे इही सेती आज हमन ल कोर्ट म जाके लड़ाई लड़ना पड़त हावय। अब न्यायलय ले अपन हक लेके रइबेा। उहें पद्मश्री अनूप रंजन पाण्डेय ह किहिन के पूरा छत्तीसगढ़ के खातिर लोगन ल अपन मातृभाषा के खातिर एकजुट होना पड़ही। साहित्यकार संजीव तिवारी, वरिष्ठ पत्रकार राम अवतार तिवारी, पहिली संस्कृति सलाहकार अशोक तिवारी, साहित्यकार डॉ. सुधीर शर्मा ह तको अपन विचार रखिन।