अंजोर.रायपुर,03 नवम्बर। छत्तीसगढ़ राज्य विधिक सेवा प्राधिकरण बिलासपुर के मुख्य संरक्षक अउ मुख्य न्यायाधीश अरूप कुमार गोस्वामी अउ न्यायमूर्ति गौतम भादुड़ी, कार्यपालक अध्यक्ष छत्तीसगढ़ राज्य विधिक सेवा प्राधिकरण बिलासपुर के निर्देश के मुताबिक कानूनी जागरूकता म आधारित लघु फिल्म महोत्सव-शूट फॉर लीगल अवेयरनेस-सीजन 2020 के आयोजन 9 नवंबर ले 14 नवंबर तक पंडित दीनदयाल उपाध्याय आडिटोरियम रायपुर म करे जाही। जानबा होवय के ये फिल्म समारोह साल 2020 म आयोजित करे जाना रिहिस, फेर कोरोना महामारी के सेती एला स्थगित करके दे गे रिहिस। फिल्म फेस्टिवल म 663 फिल्म के प्रविष्टि मिले हावय। जेमा ले 119 छत्तीसगढ़ ले, 263 आन प्रदेश ले अउ 279 फिल्म विदेश ले मिले हावय।
फिल्म फेस्टिवल के आयोजन म चार विषय के सामिल करे गे रिहिस। जेकर ले मानव तस्करी, लइका के अधिकार-बाल श्रम, बाल शिक्षा, नशा उन्मूलन अउ नशापीड़ित मन के पुर्नवास अउ साइबर क्राइम सामिल हावय। फिल्म के बखत 5 ले 10 मिनट हावय अउ हिन्दी, अंग्रेजी अउ छत्तीसगढ़ भाषा के अतिरिक्त आन भाषा के फिल्म जेला अंग्रेजी भाषा म सबटाईटल दे गे हावय। प्रतियोगिता म सर्वश्रेष्ठ फिल्म ल एक लाख रूपए, द्वितीय पुरस्कार पचास हजार रूपए, बेस्ट सुपर शार्ट फिल्म ल इक्कीस हजार रूपिया, सुपर शार्ट फर्स्ट रनर अप ल ग्यारह हजार रूपए, सेकण्ड रनर अप के पांच हजार रूपिया दे जाही।
येकर अलावा पांच फिल्म ल स्पेशल यूरी अवार्ड भी दे जाही। ए फिल्म फेस्टिवल के शुभारंभ 9 नवंबर के अउ समापन अउ पुरस्कार वितरण समारोह 12 नवम्बर के पंडित दीनदयाल उपाध्याय आडिटोरियम रायपुर म करे जाही। 9 नवम्बर ले 12 नवम्बर तक प्रतियोगिता म सामिल करे गे चयनित फिल्म के प्रदर्शन फोकट म करे जाही। फिल्म फेस्टिवल के आयोजन जीपीआरएसएस रायपुर के तकनीकी सहयोग ले करे जाथे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।