स्वामी आत्मानंद हिन्दी माध्यम उत्कृष्ट शासकीय स्कूल अब सबो जिला म खुलही : मुख्यमंत्री दाऊ भूपेश बघेल

अंजोर.रायपुर, 08 सितम्बर। मुख्यमंत्री दाऊ भूपेश बघेल ह किहिन के छत्तीसगढ़ म हर व्यक्ति, हर परिवार अउ हर वर्ग के लोगन के विकास म विशेष जोर दे जा हावय। येकर तहत प्रदेश म हर तबके के भलाई के धियान म रखत सरकार डहर ले नित नवा योजना बनाये जात हावयं अउ उंकर सुव्यवस्थित संचालन करके लोगन ल जादा ले जादा लाभ दिलाये जात हावय।

मुख्यमंत्री श्री बघेल अपन निवास कार्यालय म कांकेर जिला ले आने-आने सामाजिक संगठन मन के प्रतिनिधि मंडल ले मुलाकात के बखत ओला सम्बोधित करत रिहिस। ए मउका म महिला अउ बाल विकास मंत्री श्रीमती अनिला भेंड़िया, संसदीय सचिव शिशुपाल सोरी, संसदीय सचिव इन्द्रशाह मंडावी, बस्तर आदिवासी विकास प्राधिकरण के उपाध्यक्ष संतराम नेताम, विधायक डॉ. लक्ष्मी ध्रुव अउ विधायक दलेश्वर साहू उपस्थित रिहिस।

मुख्यमंत्री ह बताइन के प्रदेश म अब अंग्रेजी माध्यम के तर्ज म हर जिला म स्वामी आत्मानंद हिन्दी माध्यम उत्कृष्ट शासकीय स्कूल खोले जाही। ये मउका म कांकेर जिला ले पहुंचे प्रतिनिधि मंडल म सामिल सोमनाथ जैन, चमन साहू, सुश्री सुभद्रा सलाम, सुनील गोस्वामी, अनिल यादव, कमलेश कुमार, जनक कश्यप, राम निषाद, सुश्री कांति पटेल उक ह भी अपने-अपने विचार व्यक्त करत क्षेत्र म संचालित जनकल्याणकारी कार्यक्रम ल लोगन के हित म जरूरी बताइन अउ येकर संचालन के खातिर मुख्यमंत्री श्री बघेल के प्रति आभार जताइस।