उद्यानिकी फसल तको सामिल होइस राजीव गांधी किसान न्याय योजना म, फल-फूल, सब्जी अउ मसाला के खेती करइया मनला मिलही इनपुट सब्सिडी

अंजोर.रायपुर, 15 सितम्बर। छत्तीसगढ़ सरकार डहर ले राज्य म फसल उत्पादन अउ फसल विविधीकरण ल बढ़ावा दे के उद्देश्य ले संचालित राजीव गांधी किसान न्याय योजना के दायरे म अब खरीफ सीजन के उद्यानिकी फसल मन ल भी सामिल करे गे हावय। राज्य म खरीफ मौसम म फल-फूल, सब्जी अउ मसाला के खेती करइया किसान मन ल योजना के प्रावधान के तहत प्रति एकड़ के मान ले 9 हजार रूपिया के आदान मदद रकम (इनपुट सब्सिडी) मिलही। जानबा होवय के खरीफ सीजन 2020 म धान के खेती वाला रकबा म यदि उद्यानिकी फसल मन के खेती चालू खरीफ सीजन म करे जाये म प्रति एकड़ 10 हजार रूपिया इनपुट सब्सिडी दे जाये के प्रावधान राजीव गांधी किसान न्याय योजना के तहत करे गे हावय। 

राज्य सरकार के ए फैसला ले राज्य के उद्यानिकी किसान मन म उत्साह हावय। येकर ले राज्य म उद्यानिकी फसल मन ल बढ़ावा मिलही। फसल विविधीकरण ले लोगन के स्वास्थ्य अउ पोषण स्तर म भी सुधार होही। उद्यानिकी संचालक ह बताइन के खरीफ मौसम म राज्य म फलोत्पादन के तहत केला, पपीता, नाशपाती, अमरूद, ड्रेगन फ्रूट, बेर, आंवला अउ नींबू वर्गीय फसल अउ सब्जी के खेती के टमाटर, आलू, भिंडी, बैगन, शकरकंद अउ कद्दू वर्गीय फसल, फुल म गुलाब अउ गेंदा फूल के खेती, मसाला ले मिर्ची, हल्दी, अदरक उत्पादक किसान मनके प्रति एकड़ के मान ले 9 हजार रूपिया के आदान मदद रकम (इनपुट सब्सिडी) दे जाही। काजू प्लांटेशन करइया किसान मनला भी राजीव गांधी किसान न्याय योजना के तहत अनुदान मदद मिलही।