अंजोर.बिलासपुर, 17 सितंबर। राष्ट्रीय विधिक सेवा प्राधिकरण के दिशा निर्देश म छत्तीसगढ़ राज्य विधिक सेवा प्राधिकरण डहर ले 17 सितंबर ले प्रदेश भर म ‘न्याय जनता के द्वार अभियान’ सुरू करे जात हावय। अभियान के शुरूआत करत दू लीगल एड क्लिनिक बस के आज छत्तीसगढ़ हाईकोर्ट परिसर बिलासपुर ले कार्यवाहक मुख्य न्यायाधीश प्रशांत कुमार मिश्रा सहित हाईकोर्ट के सबो जज ह हरा झंडी देखाके रवाना करिन। ये बस राज्य के दूरस्थ अंचल म पहुंचके लोगन ल न्याय के खातिर जागरूक करही।
हाईकोर्ट परिसर के अलावा सबोच जिला म भी एक-एक लीगल एड क्लिनिक बस विशेष टीम के संग रवाना करे गिस हावय। ये टीम कम से कम 100 गांव म जाके न्याय के खातिर लोगन ल जागरूक करे के बुता करही। हाट बाजार जइसे आने-आने सार्वजनिक जगह म शॉर्ट फिल्म्स के माध्यम ले आम लोगन ल जागरूक करे जाही। 100 ले जादा शिविर के बखत विशेष रूप ले उन सबो जरूरी कानून के बारे म जानकारी दे जाही जेन स्वस्थ समाज के खातिर जरूरी हावय। एमे गुड टच बैड टच, छात्रावास म लइका के अधिकार, खेल म भाग ले के प्रेरणा, साइबर अपराध के प्रति सचेत करना, साइबर कानून के प्रति जागरूक रहना सामिल हावय। संग ही ड्रिंक एंड ड्राइव के कानून, भ्रूण परीक्षण म प्रतिबंध संबंधी कानून, पॉक्सो एक्ट के गंभीरता, कार्यस्थल म महिला मन के अधिकार अउ समान वेतन के अधिकार जइसे केऊ विषय के जानकारी दे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।