महिला स्व-सहायता मनके जुन्ना करजा माफ, तीजा-पोरा म मुख्यमंत्री दाऊ भूपेश बघेल दीस समूह के दीदी मनला बड़का सौगात

अंजोर.रायपुर, 6 सितम्बर। मुख्यमंत्री दाऊ भूपेश बघेल ह अपन निवास म आयोजित तीजा-पोरा तिहार कार्यक्रम के मउका म समूह के दीदी मनला दीस बड़का सौगात। मुख्यमंत्री ह महिला कोष के करजा योजना के सबो महिला समूह के जुन्ना करजा ल माफ़ करे के घोसना करिस ताकि वोमन फेर करजा लेके नवा आर्थिक गतिविधी सुरू कर सके। 

मुख्यमंत्री ह येकर संग ही महिला कोष ले महिला समूह ल प्रति साल दे जाये वाला करजा के बजट म भी 5 गुना बड़वार के घोसना करत होए महिला कोष के बजट के रकम दू करोड़ रूपिया ले बढ़ाके 10 करोड़ रूपिया करे के घोसना करे हावय। मुख्यमंत्री ह किसान मन अउ मजदूर मन के बाद अब महिला मन के खातिर न्याय के पहल करत होए घोसना पाति के अपन एक अउ वादा पूरा कर दे हावय।

मुख्यमंत्री श्री बघेल के ये घोसना राज्य म न्याय के एक कड़ी ल अउ आगू बढ़ाये के रूप म देखे जात हावय। येकर ले स्व सहायता समूह ले जुड़े लाखों बहन के मुड़ ले 12 करोड़ 77 लाख रूपिया के कर्जा के बोझा उतर जाही।