नगरी के कोटेश्वर धाम म औषधीय प्रसंस्करण अउ प्रशिक्षण केंद्र खुलही : मुख्यमंत्री दाऊ भूपेश बघेल ह वैद्यराज सम्मेलन म करिस घोसना

अंजोर.रायपुर, 11 सितंबर। मुख्यमंत्री दाऊ भूपेश बघेल ह धमतरी जिला के नगरी के डोंगरडूला के कोटेश्वर धाम म ऋषि पंचमी के मउका म आयोजित पारंपरिक वैद्यराज सम्मेलन म संघरिस। मुख्यमंत्री ह किहिन के वैद्य मनके पारंपरिक ज्ञान ल लिपिबद्ध करके सहेजे के काम राज्य सरकार ह शुरु कर दे हावय, एला अउ आगू बढ़ाये जाही। ओमन वैद्यराज ल प्रोत्साहित करत किहिन के जेन रकम ले घर के बाड़ी म सब्जी भाजी उगाथे, उही रकम ले वैद्यराज भी बाड़ी म औषधीय पौधा लगावे। वैद्य बाड़ी के खातिर शासन डहर ले अनुदान भी दे जाही।

ए मउका म श्री बघेल ह कोटेश्वर धाम म औषधी प्रसंस्करण अउ प्रशिक्षण के खातिर केंद्र खोले बर, वैद्य के खातिर विश्रामगृह के निर्माण कराये, धान खरीदी केंद्र खोले बर, कोटेश्वर धाम के 4 हेक्टेयर क्षेत्र म सामुदायिक वन अधिकार पट्टा दे, कोटेश्वर धाम के सात धारा म स्टापडेम निर्माण, यज्ञ शाला म शेड के निर्माण अउ कोटेश्वर परिसपर म सौर ऊर्जा ले विद्युत अउ पेयजल के बेवस्था करे के घोसना तको करिस। येकर अलावा ओमन ह बेलरगांव ल तहसील बनाये के खातिर धमतरी जिला कलेक्टर ल प्रस्ताव भेजे के निर्देश दिस। 

कोटेश्वर धाम म आयोजित परंपरागत वैद्य सम्मेलन म मुख्यमंत्री भूपेश बघेल ह किहिन के आदिकाल ले वैद्य जड़ी बूटी ले इलाज करत आए हावयं। रायपुर के मेडिकल कॉलेज म करीब दू साल पहिली 2000 ले जादा वैद्यराज मनके सम्मेलन आयोजित करे गे रिहिस। वैद्य ज्ञान ल छत्तीसगढ़ पादप बोर्ड ह एक किताब के रूप म संग्रहित करके प्रकाशित करे हावय, जेकर वितरण भी कार्यक्रम के बखत वैद्यराज मन करिन। ए किताब म आगू अउ भी वैद्यों के ज्ञान के संग्रहित करके प्रकाशित करे जाही।