ई-पंजीयन ले दूरियावथे बेरोजगारी, पढ़े-लिखे युवा मनके गांव के विकास म बढ़त भागीदारी

अंजोर.रायपुर, 26 जुलाई। हर महतारी बाप के सपना होथे के उंकर लइका पढ़ लिखके अच्छा डिग्री हासिल करें अउ अच्छा नौकरी या रोजगार ले जुड़के अपन पैर म खड़ा हो सकें। नीलिमा के माता- पिता के भी कुछ अइसे ही सपना रिहिस। अपन बेटी ल इंजीनियरिंग के पढ़ाई कराये के संग ओला उम्मीद रिहिस के डिग्री हासिल करत ही कुछ दिन के भीतर नौकरी लग जाही। नीलिमा के भी कुछ अइसे ही विश्वास रिहिस। जब हाथ म इंजीनियरिंग के डिग्री आ गे अउ साल तक कोनो नौकरी नइ मिले त महतारी बाप ही नहीं नीलिमा के सपना मानों टूट गे। कई साल तक बेरोजगार रेहे के बाद प्रदेश के मुख्यमंत्री भूपेश बघेल ह जब युवा मन ल रोजगार ले जोड़े अउ विकासकार्य म भागीदारी सुनिश्चित करे खातिर ई-श्रेणी पंजीयन प्रणाली लागू करे म नीलिमा के उम्मीद के पंख लग गे। अपन क्षेत्र के विधायक अउ नगरीय प्रशासन मंत्री डॉ. शिवकुमार डहरिया के पहल ले इंजीनियरिंग म स्नातक कुमारी नीलिमा साहू ल मुख्यमंत्री सुगम सड़क योजना ले पक्का सड़क बनाये के काम मिलेगे।   

रायपुर जिला के आरंग के नीलिमा ह बताइन के साल 2012 म बी.ई. के डिग्री हासिल करे के बाद वो ह सरलग जॉब के तलाश म रिहिस। इंजीनियरिंग करे के बाद ओला लगता रिहिस के कहीं न कहीं उंकर जॉब जरूर लग जाही। ओमन बताइन के डिग्री होए के बाद भी रोजगार अउ आमदनी के कोनो जरिया नइ होए ले दुःख के संग चिंता भी होत रिहिस। ए बीच नौकरी के तलाश के संग प्रतियोगी परीक्षा के तइयारी भी करते रिहिस। नीलिमा ह बताइन के छत्तीसगढ़ के मुख्यमंत्री भूपेश बघेल ह जब प्रदेश के 12 वीं पास ले लेके स्नातक के पढ़ाई पूरा कर चुके बेरोजगार युवक ल निर्माण बुता म काम दे के घोषणा करिस त ओला भी काम मिले के आस जगिस। ओमन बताइन के बेरोजगार युवक के खातिर शुरू करे गे ई श्रेणी पंजीयन म अपन नाम रजिस्टर कराये के बाद उम्मीद रिहिस के ओला अपन क्षेत्र म काम करे के मउका मिलही। आरंग क्षेत्र के विधायक अउ प्रदेश के मंत्री डॉ शिवकुमार डहरिया ह अपन क्षेत्र म होवइया विकासकार्य म नीलिमा ल प्राथमिकता देत 12.52 लाख रूपिया के काम दीस। मुख्यमंत्री सुगम सड़क योजना के ले आरंग विकासखण्ड के गांव रसनी म शासकीय स्कूल भवन ले मुख्य मार्ग तक बने वाला सड़क के निर्माण बुता के जिम्मा नीलिमा ल मिलेगे। 

अपन पढाई पूरा करे के बाद पहिली बार काम मिले अउ रोजगार ले जुड़े म खुशी ल बाटम नीलिमा ह मंत्री डॉ. डहरिया ले मुलाकात करके उंकर अउ मुख्यमंत्री बघेल के प्रति आभार जताइस। इंजीनियर नीलिमा कहत हावय के मोर खातिर ये गौरव के बात हावय के मैं अपन घर के आसपास होवइया विकासकार्य म अपन भागीदारी देत हवं। येकर ले मोला आर्थिक लाभ भी होही। ये सब प्रदेश के मुख्यमंत्री अउ नगरीय प्रशासन अउ विकास अउ श्रम मंत्री डॉ डहरिया के बदौलत हो सके हावय। जानबा होवय के प्रदेश म बेरोजगार युवा मन ल निर्माण बुता म रोजगार के मउका उपलब्ध कराये खातिर ब्लॉक स्तर म 20 लाख तक के बुता दे बर ई-पंजीयन प्रणाली शुरू करे गे हावय। येकर खातिर गैर अनुसूचित क्षेत्र म योग्यता स्नातक अउ अनुसूचित क्षेत्र म 12वीं पास रखे गे हावय।